Shillong, Rymphang 06 : Ki kynhun ai jingiarap, ha ka sngi thohdieng kila ioh tam sa 7 tylli ki metiap ha ka jingjia bthei bomb dynamite ha ka par tih dewiong beain ha Mynsngat, Thangsko, East Jaintia Hills.
Mynta ka jingdon jong ki nongbylla kiba iap na kane ka jingjia, kala kiew sha ka 25 ngut baroh lang.
Ka Director General of Police Kong I Nongrang ka iathuh ba 12 ngut na ki 25 ngut bala lap ia ka metiap, ki dei kiba la lah ban pynithuh.
“Ka jingwad ka dang iaid shaid shaid mynta bad ka kynhun ai jingiarap (NDRF, SDRF, SRT) ki dang pyrshang katba lah ban lap ia kiwei pat ki lanot bad ban pyndep ia ka jingithuh kham kloi kat kaba lah” kala bynrap.
U Superintendent of Police ka East Jaintia Hills, u pyntip ba ka kynhun ai jingiarap hynne ka sngi kala lap biang sa ia 4 tylli ki metiap napoh ka par hynrei ki lai ngut kiwei pat ki dei kiba iap hapdeng ka jingsumar ha ki hospital ha Shillong.
U pyntip ba uwei u la iap hapdeng ka jingsumar ha NEIGRHMS, 2 ngut kila iap na ka jingmynsaw bad la wanrah ia ki met daki bahaiing sha Civil Hospital, Khliehriat bad Jowai.
Haba iadei bad ki trai par ba la kem, une u heh Pulit u pyntip ba uwei u kyrteng u Forme Chyrmang ba 36 snem, ba na Jalaphet Pordung, East Jaintia Hills bad uwei pat u Shamehi War ba 42 snem ba na Sutnga Pohwailong, East Jaintia Hills.
Ia kine ki arngut la ialam tian bishar hakhmat ka Iingkashari kaba la ai bor ia ki Pulit ban set 3 sngi hapoh kaPolice custody na ka bynta ban pynlong ia ka jingtohkit kaba bniah.
Une u Heh Pulit ula iathuh ba ka jingtohkit ka dang iaid shakhmat ban ithuh bad ioh kem ia kiwei pat kibriew kiba don bynta ha kane ka jingjia.
