Ki project Tourism ki aikam | Ka jingkhang ka plie ban iakren, ym donkam ban hap khot, ong u DyCM

Shillong, Iaiong 15 : U Symbud Myntri Rangbah Bah Prestone Tynsong ula ai ka jingkular ba ka Sorkar ka long kaba kloi ban iakren bad ka Green Tech Foundation (GTF) kaba shong shah thngan khlem pud namar ka jingpyrshah ia ka jingthmu ban tei ia ka Taj Umiam Resort & Spa ha Umiam bad Lumpongdeng.

“Ka jingkhang jong ka Sorkar ka plie beit. Ngi la dep pynshai ia ka nongrim jong ngi bad ngi long kiba kloi ban nang ai shuh shuh ia ki jingpynshai lada donkam” ong u Bah Prestone.

Haba kylli la ka Sorkar kan phah briew ban khot iakren ia ki nongiakhih, ula jubab “Em, ym donkam. Ka jingkhang jong ka Sorkar ka long kaba plie beit na ka bynta ban ioh jingshai bad ban iakren”.

U Symbud Myntri Rangbah ula kular ba ka Sorkar ka mut hok shisha ban iada ia ka mariang haba kyntiew ia ki kam jngoh kai hapoh ka Jylla.

Ka GTF kala dawa ban pynsangeh noh ia ka project ban tei ia ka Taj Umiam Resort & Spa haba pynpaw ia ka jingsngewkhia ba ka lah ban pynjot ia ka mariang. Ka Foundation kala kynnoh ba kane ka project kan lam sha ka jingpynjot ia ka sawdong sawkun jong ka dewlynnong bad ai jingmyntoi tang ia ki katto katne.

Hynrei u Bah Prestone ula pynshai ba ka Sorkar kam don jingthmu ban shah ia kino kino ki jingtei ba neh shirta ha dewlynnong Lumpongdeng. “Ngi la kular ba kan nym don ka jingpynjulor ia ka mariang hynrei ngin nang pynitynnad shuh shuh ia ka dewlynnong” ula ong.

“Kum kijuh ki kam bala leh ban pynitynnad ia ka Nan Polok yn leh lang ha dewlynnong Lumpongdeng. Ngi nang thung dieng shuh shuh ban nang pynitynnad ia ka khnang ba kan long kawei na ki jaka ba ki nongjngohkai pyrthei kin sngewtynnad eh ban wan” ula ong.

U Bah Prestone ula ban jur ba ka project ka dei kaba thmu ban kyntiew ia ki kam jngohkai ha Jylla bad ka ban plie ia ka lad aikam aijam ia ki samla trai jylla.

“75% na ki nongtrei ka Marriott Courtyard bad Vivanta ki dei ki samla trai shnong, kiba la pyndep ia ki jingpule jong ki haki hospitality sector” ula ong haba bynrap “Kiba bun ki samla jong ngi kila mih shabar jong ka Jylla ban leit pule ha ki hospitality secto kynthup ka hotel management. Kumta ngi kwah ban thaw ia ki lad iohkam iohjam hala ka jong ka Jylla”.

U Symbud Myntri Rangbah ual pynshai ruh halor ka jingkynshew pisa bad ki jingkynnoh ioh jingmyntoi tang kito kiba don ha ka bor da kaba ong “Hato phi mu tong ba ka jingtei ia ka Secretariat thymmai kan nang pynrben ia ka pla tyngka jong ngi?. Nga kwah ban ong ba ka jingkynshew ba ngi theh mynta ha ki jingtei kan pynmyntoi iaki pateng ba hadien bad kan dei ka jingsngew sarong ia ki paidbah ka Jylla”.

Haba kylli la kane ka jingiakhih ka dei kaba khleh politics, u Bah Prestone ula ong “Ai ba ki paidbah kin bishar, ngam don eiei ban ong la ka dei kaba khleh politics ne em, ngam don eiei ban ong hynrei ka kamram jong nga ka long ban pynshai. Ta ka daw nga don hangne ban ai ia ka jingpynshai kaba bnai na ka liang ka Sorkar.