Shillong, Iaiong 15: Ka Association of Meghalaya Traders and Transporters ka kyntu Deputy Commissioner ka East Jaintia Hills District ban khang noh ia ki trok ba heh palat pud (oversized) ban iaid naki surok One Way da kaba kdew ba ka long ka jingma ia ka jingshngain jong ki paidbah bad ka jingpynjot ia ka surok.
“Ka jingïaid ki trok ba heh palat pud naki surok One Way ka long ka jingpynkheiñ ïa ki kyndon iada bala don lypa nalor ka Section 115 jong ka Motor Vehicles Act, 1988” ong u president jong ka Association u Enrico D Pasi ha ka shithi bala phah sha u Deputy Commissioner.
Ka Association ka kynnoh ba palat 800 ngut Dribar trok kit marbam ki shah pynduh ia ka kamai kajih namar ka jingiaid ki trok ba heh palat pud ba pyniaid daka Jaintia Cement Manufacturers Association (JCMA).
Kila kynnoh ba kane ka jingleh ka JCMDA khanglad bad ka pynkheiñ ïa ka hok ban trei ïa kano kano ka kam katkum ka Article 19(1)(g) jong ka riti synshar ka ri India.
Ka shithi sha u Deputy Commissioner ka pynpaw ia ki jingma kiba lah ban mih na ka jingiaid ki trok ba heh kaba wanrah ka jingkhapngiah kaba jur, ka jingma na ki jingjia aksiden kiba lah ban wanlam shaka jingiap briew, bad ka jingpynjot iaka surok.
Ka Association ka la kyntu ia u Deputy Commissioner ban pynlong ia ka jingtohkit ban wad ia ki jingshisha bad ban pynmih hukum ban khanglad ban iaid ki trok ba heh shaki surok One Way.
“Ngi shaniah pura ha ka ophis ba donburom jong phi ban pynneh ia ka jingsynshar daka ain, ban iada ia ka kamai kajih ki nongpyniaid kali trai ri, bad ban iada ia ka jingshngain jong ki paidbah ha ka distrik” la ong ka shithi.
 ban iaid naki surok One Way da kaba kdew ba ka long ka jingma ia ka jingshngain jong ki paidbah bad ka jingpynjot ia ka surok.){kind=link}