Guwahati, Lber 14 : U Nongialam ka Congress Gaurav Gagoi ha ka sngi Balang ula ong ba ki paidbah jong ka Ri kin sa iohi ia ka “Ri India ba thymmai” hadien ka elekshon Lok Sabha 2024.
Une u Nongialam ka Congress ialade un iakhun ia ka elekshon na Jorhat Lok Sabha seat.
Haba iakren bad ki nongthoh khubor, u Gagoi ula ong “Ka jingmih ba khatduh eh napdeng ki bahaiing jong nga ba iakhun na Jorhat ka dei ha u snem 1977. Ka constituency jong nga ka dei ka Koliabor, kaba u Kpa jong nga ula iakhun naduh u snem 1991 bad ka dei ka jaka jongka Congress. Ka BJP kam don lad da kumwei pat hynrei kala pyndonkam ia ka ECI ban phiah ia ka constituency”.
“Hadien u 2024, ki paidbah kin sa iohi ia ka India ba thymmai ha kaba ka riti synshar paidbah kan ieng rasong bad kumjuh ruh ka ain ka kanun, ym ka jingsynshar ka BJP lane RSS, hynrei synshar ka Ain ka ban long kumjuh ia baroh. Ngi la pynieng ia ki kyrtong kiba biang tam ha kane ka elekshon” ong u Gagoi.
Ula ong “Ka mat iakren mynta jong ka Congress ka dei ka CAA. Ka Assam ha don ka jingiadei bad kyrpang bad ka Assam Accord, ka CAA kala pynkhein ia ka Assam Accord. Ka jingthmu jong ka BJP ka long ban phiah ia ka Assam halor ka ktien ka thylliej da kaba pyntreikam ia ka CAA”.
U Gagoi ula ther ruh ia ka Sorkar ba ialam da ka BJP halor ka por bala shim ban pyntreikam ia ka CAA bad ong ba ka dei ka jingleh ban kdat ia ka jingmut jingpyrkhat u paidbah na ka hukum ka Iingkashari Supreme Court halor ka electoral bond.
“Baroh kawei ka Assam kala kyrshan ia ka jingkam u Rahul Gandhi ba u Myntri Rangbah ka Assam u dei uba Myntri Rangbah ba bamsap tam bad ula ioh bor na ki briew ba don bor ha Delhi” ong u Gagoi.
