Shillong, Iaiong 01 : Nga khot ia ki da ki nongiada ia ka wah Umngot, bad ki da long shisha kumta. Ki nongkhwai dohkha bad ki nongshong shnong jong ki 3 tylli ki shnong kata ka Samanong ha West Jaiñtia Hills, ka shnong Umsawar bad Ksangrngi ka East Khasi Hills, mynta palat lai snem kila shimkhia da ka mon sngewbha ban iada bad sumar ia katei ka bynta jong ka Wah Umngot.
Ka Wah Umngot kaba mih na ki kjat jong u lum Shillong ka tuid lyngba ki riat ba pyniakhlad ia ka East Khasi Hills na ka West Jaiñtia Hills district jong ka jylla Meghalaya.
Ha ka jingshisha, ka Wah Umngot ka thaw hi ia pud u sam ban pyniakhlad ia kine ar tylli ki district ka Jylla.
Ha ki por mynshuwa, ia kane ka bynta jong ka wah la pyndonkam bakla da ki briew shim kabu kiba pyniap khlem akor iaki dohkha naka bynta ka jingmyntoi shimet jong ki.
Ha ka 29 tarik Lber, ki Rangbah Shnong jong ki lai tylli ki shnong ryngkat bad ki nongkhwai dohkha ha ryngkat ki riew rangbah na kine ki shnong ki la ia lum lang ha rud wah Umngot ban iakren ia ka lawei jong ka jingpyrshang pynneh pynsah jong ki ia kane ka Wah.
Ia kane ka jingialang la pyniaid da u Bah Sephin Nongrum u Sordar Shnong ka shnong Umsawar bad ha kane ka jingialang la pynskhem biang ia ka rai ia kaba kine ki nongialam shnong kila shim haka jingialang kaba la long haka 16 tarik Jymmang 2024, hapoh ka shnong Khwarardong.
Haka jingialang la pynleit jingmut ha kawei ka thong kata ban iada bad pynneh pynsah ia ki doh um ha wah, la rai ruh ban bteng ban khang ia baroh ki jait rukom pyniap dohkha.
Hynrei la shah ban khwai dohkha da ki rwiang, ki jar tynrai kaba ki khot ka sasi.
Ka jingmana ïa ki rukom pyniap dohkha beain ba kynthup ïa ka jingpyndonkam ïa ki tiar pynbthei, ki dawai bih bad ka jingpyndonkam daki jar ba heh ha shilynter ka wah Umngot naduh Shka Umtalu haduh Shka Mawiang/Diengrod kaba la treikam naduh 16 Jymmang 2024.
Ha ka jingïalang kaba long ha ka 29 tarik Lber, la pynïaid da u Bah Sephin Nongrum la shim rai ban pynkiew ïa ka kuna na ka bynta kiba pynkheiñ ïa ka jingmana na ka T.20,000 sha ka T.50,000.
U Bah Sephin Nongrum u la pynpaw ia ka jingangnud ban ioh ia ka jingiatreilang na kiwei pat ki shnong na baroh arliang ka wah Umngot ha East Khasi Hills bad West Jaiñtia Hills.
Kiba bun ki trai shnong na kine ki lai tylli ki shnong ki kamai jakpoh lyngba ka jingkhwai dohkha na kane ka wah.
U Bah Real Sing Muksor naka shnong Moosakhia u la pynpaw ba u kamai jakpoh da kaba khwai dohkha ha katei ka wah katba u Bah Liios Suting uba dei u Waheh Chnong ka shnong Samanong uba dei ruh u Co-chairman jong kane ka jingialang u la kam ba ka jingbun ki dohkha ha kane ka wah ka la kiew bha, bad ia kane lah ban iohi wat tang da ki khmat.
Ha kane ka jingialang, la rai ruh ban pan ia ka jingiatreilang na ki ophis jong ki Deputy Commissioner jong baroh ar tylli ki district, u SDO ka Amlarem, bad ki BDO jong ka Thadlaskein bad Mawkynrew block.
Ki la kyrpad ruh ïa ka jingkyrshan na u Waheh Chnong jong ka shnong Sohmynting, Moosakhia, Mupyut, Chkenpyrsit, bad Chkentalang ban ïarap ban ïada bad pynneh pynsah ïa ka bynta ba sharum jong ka wah Umngot kaba dei ruh ka wah kaba khuid tam ha Asia.
