Guwahati, Risaw 10: U Myntri Rangbah (CM) ka Assam u Himanta Biswa Sarma ula ong ba ka por ka ia jong ki kam lehnoh ha ka jylla mynta kala thaw histori.Ula ong ba ka jinghiar ki kam pyntriem jong ki lehnoh ha ka thain shatei lammihngi (Northeast) kan plielad na ka bynta ki kam pynroi hapoh ka ri.
“Ki kam lehnoh ki dei ka jingeh kaba khraw ha ka thain Northeast hi baroh kawei.Ki kam lehnoh kila pynthud ia ki kam pynroi hapoh ka thain,” ong u CM Himanta Biswa Sarma.
Ia kane u CM ula pynpaw ha ka jingai jingkren ha ka ‘70th Plenary Meeting’ jong ka North Eastern Council ha ka nongbah Guwahati hynnin ka sngi U Blei.
Na ka liang u Sarma ula kren ruh halor ki sienjam kiba kila shim na ka bynta ban weng ia ki jingiakajia pud hapdeng ki jylla bapher bapher jong ka thain Northeast, kata kaba kynthup ia ka Assam.
“Ngi la shim ia baroh ki sienjam kiba lah ban poi sha ka jingiapynbeit kaba neh halor ki kam iakajia pud hapdeng ka Assam bad ka Arunachal Pradesh,” ong shuh shuh u CM Sarma.
Nalor kata u CM ka Assam ula ong ruh ba 50% na ki jingiakajia pud hapdeng ka Assam bad ka Meghalaya la lah ban ia pynbeit.
Ha ka juh ka por u Sarma u khot ruh ia ka jingiatreilang jong baroh ki sorkar ki jylla ka thain Northeast khnang ban lah ban pynkut noh ia ki kam iakajia pud.
