Shillong, Naitung 22: Hadien ki jingtip kiba tikna, ka tnad Enforcement jong ka Khasi Hills District Autonomous District Council ha ka sngi palei ka la hiar khynra Trading License ba kynsan kynsan ha Pilangkata bad thain Byrnihat ha kaba ka la lap ba ki don da ki spah ngut ki jaka khaii kiba treikam khlem da pynbiang ki kot ki sla na ki bor ba dei peit.
Ia katei ka kynhun la ïalam da u inspector ka Enforcement Bah F Kharsyntiew ryngkat u Bah B Riahtam Assistant Superintendent bad kiwei ryngkat ka jingdonlang ki nongialam ka Dorbar Shnong ka Pilangkata A bad B bad ruh ki bor pulit na Pilangkata Police Outpost.
Ha katei ka jingjurip ki la lap da ki spah tylli ki jaka kamai kiba khlem da pynbiang ki kot ki sla khamtam eh na ka KHADC.
La ioh jingtip ruh ba ka tnad Enforcement ka la pan jingpynshai na baroh kitei ki dukan ba kin wanrah ia ki kot ki sla hapoh 15 sngi lym kumta kin ngat ha ka jingshah khang khyrdep hapoh shibnai.
