Shillong, Naiwieng 27: Ka Khasi Hills Autonomous District Council hynne ka sngi Nyngkong, ka la hiar khynra Trading Licence bad Professional Taxt ha ka thain Laitumkhrah bad ha kane ka jingkhynra, kala phah khang khyrdep ia bun tylli ki dukan jong ki bar jylla kibym shym la pynbiang ia kine ki jingdonkam kiba dei ban ioh na ka Council.
Ia kane ka jingkhynra la ialam hi da u Executive Member (EM) ka tnat Land Bah Teibor Pathaw haka jingdonlang u MDC ka Laitumkhrah constituency Bah Fantin Lakadong.
Ka KHADC kala khynra ia ka Professional Tax ban pynthikna ba baroh ki bar Jylla ki siew thikna ia ki Professional Tax ha ka kam khaii ba ki trei.
Kane ka jingkhynra bala pynlong da ki Pulit ka tnat Enforcement ka Cuncil, kala sdang naduh Fire Brigade ter ter shaduh Iew Laitumkhrah bad la khynra ia baroh ki dukan kiba don ha shilynter ka surok bah jong ka thain.
Haba kren sha ki lad pathai khubor u Bah Fantin ula ong ba lah ban ong ba kumba 80% ki nong shong dukan hapoh Laitumkhrah ki dei kiba bud iaki kyndon daka pynbiang iaki kot ki sla hynrei ki dang bun kiba ym pat tip haba iadei bad ka jingdonkam ban pynbiang iaka Professional Tax.
U Bah Fantin ula ong ba naka liang ka Executive Committee kala rai ban iai bteng ia ka jingtalasi iaki dukan bar (professional tax bad Traling Licence) ym tang ha Laitumkhrah hynrei ha kylleng ki jaka ba hap haka jingkhmih ka District Council.
Ha kane ka sngi kila don ruh ki bar jylla kiba shongdie madan ki bym don satia ia ki kot ki sla ba biang bad naka liang ki Pulit ka Enforcement kila bthah iaka ban lum iaki mar mata.
