Shillong, Jylliew 24 : Ki Pulit ka Anti-Infiltration Directorate ha ka sngi Nyngkong, kila pynlong ia ka jingkhynra ia ki nongbylla bar jylla kiba khlem kot khlem sla ha ka thain Nongmensong bad Mawpat.
Ki nongbylla bar jylla, kiba bun ki dei na Assam, ba bylla ha ki jingtei bapher bapher, la bthah ba kin pyni ia ki kot ki sla kum ka Labour Licence, Aadhaar bad EPIC.
Ka tyllong khubor ka iathuh ba ki Pulit, kila lap ba don haduh 15 ngut kiba khlem kot khlem sla ha kane ka jingkhynra.
Ka Heh Pulit ka Directorate kila maham ia ki nongbylla bar jylla ba khlem kot khlem sla ba kin shah pynphai biang sha ka Jylla ba ki wan.
Haba iaroh ia kane ka jingpyrshang ka Directorate ban bat ia ki nongbylla bar jylla, ka KSU kala ong ba ka jingkhynra khlem da pan ia ka work permit kan long leh noh eiei namar kane ka ain ka dei kaba khang ia ki nongbylla ban sah hapoh ka Jylla.
“Kumta, ngi kyntu ia ka Anti-Infiltration Directorate ban bthah ia ki nongbylla bar jylla bad ki contractor ba aikam ia ki, ba kin pyni ia ki work permit lem kumta kin shah pynphai biang lane shah pynshitom kat kum ki ain” ong u samla Donald V Thabah, General Secretary ka KSU ha ka kyrwoh.
Ha kawei ka liang, u samla Donald ula ong ba ka KSU ka kwah ban kylli ia ka Sorkar Jylla halor ka jinglong jingman jong ka Meghalaya Residents Safety & Security Act (MRSSA) 2016.
“Kaei kaba khang ia ka Sorkar Jylla ban pyntreikam ia ka MRSSA haba ka Sorkar Pdeng lyngba ka Ministry of Home Affairs (MHA) kala pynphai pat ia kane ka ain sha ka Sorkar Jylla” ula buh jingkylli.
Nalor kane, une u Nongialam ka KSU ula ong ba ka Union kan sa wad ia ki daw hashuwa ba kan shim ia ka rai ban pynbor ia ka Sorkar ba kan pyntreikam noh mardor ia kane ka ain.
“Ka KSU ka kwah ruh ban pynkynmaw ia ka Sorkar MDA, ioh ba ka klet, ia ka jingdonkam ban buddien khlem shongthait bad ka Sorkar NDA halor ki jingdawa ba sahteng ban pyntreikam ia ka ILP, ban pynrung ia ka ktien Khasi ha ka khyrnit ba phra bad kiwei kiwei” ula bynrap.
“The KSU would also like to remind the MDA government, less it forgets, the need to aggressively pursue with the NDA government on the pending demands for implementation of ILP, inclusion of Khasi language in the Eighth Schedule and others,” he added.
