Shillong Lber 09: Ka seng JSU War Jaintia Circle bad ka Syndai Unit ha ryngkat bad ka bor shnong, hynne ka sngi Saitjaiñ kila khynra naphang ia ki mynder ri ki bym dei na kane ka jylla bad na ka ri India, kiba la wan buhai shnong hapoh ka shnong Lakroh.
Ki dkhot ka seng ha ka jingdon lang ryngkat ki nongkitkam shnong kila khynra ia ki kot ki sla jong kine ki mynder ri kiba thaw lad ban shong ei bad leh trai hapoh ka shnong Lakroh kaba don ha Amlarem Sub Division kaba don khappud bad ka ri Bangladesh.
U General Secretary ka JSU u Bah TR Suchen ula pyntip ba ki nongialam ka seng JSU hadien ba ki lah ioh jingtip na ki trai shnong ba kine ki mynder ri kiba don hapoh ka shnong kila thmu ban shna sa ia ka ïing mane Blei (Temple) kaba heh hapoh u pud u sam ka shnong, khlem da ioh bor na ki bor shnong, kumta ka seng ka lah pynsangeh mardor ia kane ka jingtei be aiñ kaba lah shu leh donbor kine ki mynder.
Ka JSU ryngkat bad ki bor shnong, kin sa shnong pyrkhat bad ban pynsngew sha ki bor ka aiñ ban khanglad ia kine ki mynder ri na ka jingwan buhai shnong bad ka seng kala beh krad ia kito ki bym don hok ban shong ban sah hapoh ka shnong bad hapoh ka thaiñ hi baroh kawei.
Ka JSU ka pynpaw ruh iaka jingsngew nguh ia ki nongialam shnong Lakroh kiba lah kloi ban pyntip sha ka seng ban iatreilang ban beh krad ia kine ki mynder ri na ka shnong bad ka seng ka kyntu ia kiwei pat ki dkhot ka bor shnong hapoh ka Bri u Hynñiewtrep ba kidei ban mih shakhmat ban iatreilang bad ki sengbhalang bad ki bor ka aiñ, khnang ban ioh khanglad ia ka jingwan buhai shnong jongki mynder ri.
