Tura, Lber 09: Saw ngut ki nongdie droks kila shah kem ha ki pulit jong ka South West Garo Hills ha ka jingkhynra kaba kila pynlong ha ka miet jong ka sngi Thohdieng.
“Hadien ba ngi la ioh ia ki jingtip kiba paka, ngi la pynlong ia ka jingkhynra ha Balalgre kaba hap hapoh ka jingkhmih jongka Damalgre Police Station bad ngi la ioh kem ia ki 4 ngut ki suba nongdie droks bad la ioh kurup ruh ia ki jingdih pynbuaid kiba sniew” la iathuh ki pulit.
Kitei ki 4 ngut kiba la shah kem la tip kum u Chanchu M Marak na Balading, Tura, u Santo Bhowmick uba ju khot sin u Kamlesh na Hawakhana, u Raj Barman na Hawakhana, Tura bad u Topon Das na Singimari, Hallidayganj, West Garo Hills.
Ki pulit kila iathuh ba na kitei kiba la shah kem, la ioh kurup 150 tylli u SPSHEN+ bad la kurup ruh 3 tylli ki mobile phone bad ia ka Autorickshaw kaba kila pyndonkam.
Ia katei ka jingkhynra la ialam da u Ravi K. Sangma, Dy SP(HQ), Ampati, ANTF
West Garo Hills, Tura bad ka ANTF, South West Garo Hills, Ampati.
Kitei kiba la shah kem, kila wanrah ia kitei ki jingdih na Mankachar, Assam da ka jingthmu ban die bad ban sam ha kylleng ka rilum Garo.
Ki pulit kila iathuh ba kitei kiba shah kem, kila dei ruh kiba la ju shah kem teng bad kila shah kem ruh ha kiba bun ki case kiba la jia ha rilum Garo.
