Byrnihat, Nailar 08 : Ka Federation of Khasi Jaintia & Garo People (FKJGP) North Khasi Hills, ha ka sngi Thohdieng, kala hiar khynra mynder ha kylleng ki jaka ka thain Byrnihat khamtam ha ki karkhana kiba don ha ka Industrial Estate namar ka jingioh khubor ba ki ai jaka rieh ia ki mynder kiba shah kyndang ha ka Sorkar Assam.
Ia kane ka kam la leh ruh namar ka jingsheptieng ba kito ki mynder ba shah kyndang na Assam, ki lah ban wan rung bad riehtngen ha ki jaka khappud ka Jylla bad ka Assam.
Kat kum ka jingong kane ka seng, da ki hajar ngut ki mynder bad nongbylla bar jylla la shem ba kila trei ha kine ki karkhana khlem ki kot ki sla kiba biang, kum ka Labour Licence bad ki jingpynshisha na ki Pulit (police verification). Kane ka seng kala kyndang ban beh krad ia kine ki briew ba kin leit phai shala ka jong ka jaka ba ki wan.
Ia kane ka jingkhynra la ialam da u President ka FKJGP Byrnihat Circle Kitborlang Suting bala synran lang da u general Secretary Noah Khongstit, Vice President Debos Chyne, bad General Secretary ka FKJGP North Khasi Hills Bah Ricky Majaw lem bad kiwei kiwei.
Ha kane ka jingkhynra, kane ka Seng kala lap ruh ia katto katne ki nongbylla kiba dang hapoh ka 18 snem ka rta bala ai kam da ki karkhana. Ki nongialam ka Seng kila pynpaw ia ka jingsngewkhia halor ka jingpynkhein ia ka Child Rights Act bad ki ain ba iada ia ki khynnah jong ka Jylla.
Haba kren sha ki nongthoh khubor, u Bah Kitborlang Suting ula iathuh ba ka seng kala shim ia kane ka sienjam halor ka jingioh khubor ba bun ki karkhana kila ai jaka rieh bad aikam ia ki mynder ri khlem da don ia ki Labour Licence bad ki jingpynshisha na ki Pulit.
“Hadien ba ioh bat da ki hajar ngut ki nongbylla, ngi la phah leit phai biang ia ki sha ki jaka ba ki wan ryngkat ka jingmaham ba tyngeh ba kim dei ban wan rung sha Jylla ban wan trei bylla khlem da pynbiang ia ki kot ki sla ba donkam” ula ong.
Ka FKJGP kala pynrem jur ia ka Khasi Hills Autonomous District Council (KHADC) bad ka Tnad Labour ka Jylla namar ka jingbym lah ban pynlong ia ka jingtalasi man ka por, haba kynnoh ba kane ka jingbym shimkhia kine ki bor treikam, kala ailad ia ki nongbylla bar jylla ba beain ba kin iai neh ha Jylla.
Ka FKJGP kala maham ruh ba kan dang iai bteng ban pynlong ia kum kine ki jingkhynra ban khanglad ia ki nongwan buhai shnong beain ba kin riehtngen ha ki karkhana ha Meghalaya. Kala mana ruh ia ki karkhana bad ki kompani ba kim bit ban aikam ia ki bar jylla ba khlem kot khlem sla haba maham ba ka seng kan leh da kaba tyngeh lada don kano kano ka jingpynkhein ia ki ain ka Jylla.
 North Khasi Hills, ha ka sngi Thohdieng, kala hiar khynra mynder ha kylleng ki jaka ka thain Byrnihat khamtam ha ki karkhana kiba don ha ka Industrial Estate namar ka jingioh khubor ba ki ai jaka rieh ia ki mynder kiba shah kyndang ha ka Sorkar Assam.){kind=link}