Nongpoh, Nohprah 7: Ka Federation of Khasi Jaintia & Garo People FKJGP Pahamsyiem Unit hynne ka step sngi Balang ki la khynra Labour License bad Police Verification kaba syndet iaki Bar jylla kiba wan ban sah trei haka shnong Pahamsyiem.
Ia kane ka kynhun la ialam da u President Samla Banbuddien Suting Kum ha ka jingiadonlang u Samla Bornky Mawphlang Secretary, Jeffrey Lyngdoh Vice President, Samla Pyntngen Nongshli assistant Secretary ha ryngkat bad ki dkhot jong ka Seng.
Haba kren sha ki lad pathai khubor, u Samla Banbuddien Suting u la ong ba kane ka jingleit khynra Labour License bad Police Verification ka long ban pynshisha iaka jinglong jong u ne ka briew kiba nabar ka jylla namar ka jingnang roi jong ki bar jylla ba wan sah trei bad ban shong dukan ha ki surok bah kiba hap haka shnong Pahamsyiem, bad ban lap ruh ba kine kiba bar jylla ki biang ne em ia kitei ki kot ki sla.
U la iathuh ba ha kane ka jingkhynra la lap ba don kiba la biang ki kot ki sla bad la shem ruh katto katne kiba khlem lah ban pynbiang iaki kot ki sla.
Ula bynrap ba ka seng ka la aipor shitaiew ia kito ki bar jylla ki bym lah ban pynbiang iaki kot ba kin wanrah iaki kot ki sla ki ba biang, lada kim lah ban pynbiang ka seng kan shim da kiwei pat ki sienjam kiba tyngeh pyrshah ia ki.
