Shillong, Naitung 15 : U Myntri kam bording ka Jylla Abu Taher Mondal, ula pynpaw ia ka jingsngew khia halor ka jingnang hiar ka um ha pung Umiam bad ong ba ka jingduna ka um ha ka pung, khlem pep kan sa ktah ia ka jingpynmih bording.
“Ngi kyrmen ba ka um kan sa wan shen bad pyndap ia kane ka pung. Nga kham jur ka jingkhulai ban ia phi iasia” ong u Mondal haba jubab ia ka jingkylli ha ka jingiakynduh bad ki lad pathai khubor ha ka sngi Ba-ar.
U Myntri ula pynpaw ba ka jingdon ka um mynta ha pung Umiam ka dang biang hynrei ka jinglong jingman ka lah ban kylla kaba shong eh ha kane ka lyiur.
“Ia mynta hi ngi dang biang hynrei ngam tip haduh katno kane ka lyiur kan iaid lait na ngi bad kan shong eh ha ka. Hooid, lada u slap u wan ngin sa ioh bun ka um” ula ong.
U Myntri ula pynpaw pat ba ka dang kloi palat ban batai lada ka jinglong jingman kan lam sha ka jing pynjari ia ka jingpynlip bording.
Haba kylli la ka jingduna u slap kan ktah ia kiwei ki project pynmih bording kynthup ka Leshka, u Mondal ula ban jur ba lad aka lyiur ka ioh bha ia u slap, ka um ka don, ka jingpynmih bording ruh ka bun hynrei lada duna u slap, ka jingpynmih bording kan shah ktah.
Ula ai nuksa da kaba ong “Ka Ganol kaba lah ban pynmih bording haduh 22.5 megawatt, mynta na ka jingther u slap dang shen, ki niut ki nier kila lang ha Ganol hynrei ha kitei ki sngi kila lah ban pynmih wat haduh 24 megawatt kaba mut ngi la pynmih tam haduh 1.5 megawatt. Kumta, nang bun ka um nang bun ka jingpynmih bording”.
Shuh shuh, u Myntri ula iathuh ruh ba ka Jylla kala iadie iathied ia ka bording lyngba ka lain kylliang bording.
Ula pynpaw ba ka pisa ba ka Jylla ka hap siew sha ki kompani ka Sorkar Pdeng kum ka NEEPCO, NTPC bad Powergrid kala duna bad mynta ngi la pyrshang ban siew noh ia ka pisa ba T.664 klur bala pynsah sha ka NTPC hapoh u 2027.
