Jowai, Nailar 13 : Ki paid nongshongshnong jong ki shnong khappud ka Amlarem Civil Sub Division, kila pynpaw ia ka jing khuslai halor ka jingduna jong ki shipai Border Security Force (BSF) ban pahara ha khappud namar ka jingsyier ia ka jingwan rung tuh ki nong Bangladesh hadien ka jingsynjor ka synshar khadar bad ka suk ka sain ha kane ka Ri ba marjan.
Kane ka jingkhuslai kala mih hadien ka jinghiar jurup ia ki jaka khappud ka Civil Sub Division da ka seng Federation of Khasi Jaintia & Garo People (FKJGP)-Jaintia Hills ha ryngkat ka Synjuk ki Waheh Chnong War Jaintia, hynne ka sngi Ba-ar.
Shuwa kane ka jingjurip, kine ki kynhun kila iakynduh ia u Officer Incharge ka Dawki Police Station bad kyrpad ia ki Pulit ba kin pynkhlain ia ka jingiaid pahara ha ki jaka khappud bad ban iatrei ryngkat ryngkat bad ki Waheh Chnong kiba don ha ki khappud ka Ri bad ka Bangladesh.
Kane ka kynhun kala hiar jurip ia ka khappud naduh Riahjalong haduh Amdoh bad shem ba ki shipai BSF kim shym la don satia ha kiba bun ki jaka ap pahara (sentry post).
Kane ka thain ka dei ka bym pat ker sainar shiah ia ka khappud, kaba pynaram bha ia ki nong Bangladesh ban rung tuh sha u pud u sam ka Ri India.
U President ka Synjuk Waheh Chnong Bah Twinson Rymbui bad u General Secretary Kampher Pohlong, kila pynpaw ia ka jingsngewkhia halor ka jingshem ia ka jingduna jong ki shipai BSF ha ki jaka khappud khamtam haba peit ia ka jinglong jingman ka suk ka sain hapoh Ri Bangladesh.
Kila kyntu ia ka Sorkar Jylla bad ki bor District ba kin shimkhia ha kaban iakren ia kane ka kam namar ka jingioh rung suk jong ki nong Bangladesh kan sa ktah jur ia ka suk ka shngain ha ki shnong ki thaw kiba don ha khappud.
U Bah Damian War, President ka FKJGP-West Jaintia Hills ula ong ba ha kane ka jingwan jurip, la shem ba ka thain ka dei kaba don jingma bha na ka jingwan rung tuh ki nong Bangladesh namar ka jingbym pat ker sainar ia ka khappud.
