Nongpoh, Nailur 20: Ka Dorbar Shnong Lumdaitkhla Bhoirymbong ha Ri Bhoi District ka la hap ban mad ia ka jingeh kaba khraw bha ban wanrah ia ka khuid ka suba hapoh ka shnong, bad ka daw ka long ba ka shnong kam don ia ka jaka theh ñiut khamtam ba katei ka shnong ka don ia ka iew Bhoirymbong, kaba dei kawei na ka iew kaba heh bha ha ka thaiñ Ri Bhoi Mihngi.
Ban weng ia katei ka jingeh ki paidbah, ka Dorbar Shnong Lumdaitkhla mynta ka sngi ka la lum da ka Dortbar shnong ban ai jingpynshai sha ki paidbah halor ka jingthmu ban wan rah ia ka Solid Waste Management ha katei ka shnong.
Kane ka Shnong haduh mynta ka hap ban theh ïa ki jaboh ba mih na ka iew bad na ka shnong ha Madan Kurkalang na ka daw ba kam pat don kata ka jaka theh niut ban leh katkum ka juk stad mynta (Scientific Method.)
Ki paidbah nongshong shnong kynthup naduh ki Samla, ki Longkmie, ki rangbah mynta ka sngi ki la shim bynta ha ka jingialang paidbah bala pynlong da ka Dorbar Shnong.
Ha kane ka jingialang, u samla na ka shnong Umpliing Shillong samla Banbhalang Diengdoh u la wan ban pynshai sha ki paidbah halor ka jingmut jong ka Solid Waste Management, namar ha ka shnong Umpling une u samla ryngkat ka kynhun kila pyntreikam ia ka Solid Waste Management kaba ki la leh katkum ka juk stad mynta bad kaba dei ruh ka rukom leh kaba ym ktah ia ka koit ka khiah ki paidbah ne kaba ktah ia ka meimariang.
Ki Nongialam Shnong kynthup ia u Rangbah Shnong, u Bah S.T Rympei, u Bah Readieng Rymbai, Secretary Shnong bad u Bah S, Lamare, Chairman ka Dorbar Shnong, ki la pyntip b aka Shnong kala dep ban thied ia ka jaka ban pyntrei ia ka Solid Waste Management hapoh u puid u sam ka Shnong Lumdaitkhla bad ki la ioh ruh ka jingiarap na ka KHADC ban ker kynroh ia kane ka jaka.
Kaei kaba la pynlong ia ka Shnong ban lum ia kane ka Dorbar ka dei namar ba bun ki paidbah nongshong shnong ki la shah pynsngewthuh bakla ba ka shnong ka thmu ban wanrah ia kata ka jaka theh niut ha ka shnong khlem da pynshai pat b aka dei ka Solid Waste Management katkum ka juk stad ba mynta.
Kine ki Nongialam Shnong kila pyntip ba bor shnong kala kynduh mawsiang na ka daw ka jingbym don kata ka jaka theh niut kaba biang bad katba ki jaboh pat kiba mih na katei ka iew la shu hap ban leit theh sha Madan Kurkalang ha kaba katei ka jaka ka dei ka jaka ba ki samla ki pynleit jingmut ha ka jingialehkai sport.
