Boko, Naiwieng 04 : Ki rawon ka West Khasi Hills, kila ioh khur ia ki khusnam kum ki nongjop ha ka jingiakop khwai dohkha kaba la pynlong ha Hahim, Boko, kaba hap hapoh ka Kamrup District ka Assam hynnin ka sngi Thohdieng.
Palat 500 ngut ki rawon na ki jaidbynriew bapher bapher jong ki artylli ki Jylla ba kynthup ia ki Khasi, Garo, rabha, Boro kila wan iashimbynta ha kane ka jingiakop khwai. Wat ki rawon na Ri-lum Garo bad Goalpara kiba iashimbynta ha kane ka jingiakop.
Kane ka jingiakop khwai dohkha kala sdang naduh ka por 9 baje mynstep haduh 2 baje janmiet bad ka khusnam ba nyngkong ka dei T. 1 lak, ba-ar T. 35,000 bad balai T. 15,000 lem bad 20 tylli ki consolation ba mar T.2000.
Ki rawon na West Khasi Hills kila ioh rah ia baroh lai tylli ki khusnam bad kine ki dei u Tom Syiem na Tikardum uba la ioh ia ka dohkha ba hehduh kaba khia 2.820 kg, u Boslan Jahnoh na Nongmalin uba wan ba-ar bad u Blasting Nongpang na Nawsryiam uba wan ha ka kyrdan balai.
U Kailash Sharma, dkhot jong ki nongpyniaid,ula iathuh ba kane ka jingiakop khwai dohkha ka dei kaba ju pynlong manla u snem naduh u snem 2015.
“Bun sien ki briew na baroh artylli Jylla ki ju poi sha ka jingiakynad namar ki kam iakajia pud lem bad kiwei kiwei, ta ka daw ngi la pyrshang ban weng ia kine ki jingiakynad da kaba pynlong ia kum kane ka jingiakop” ula ong.
