Shillong, Nailar 17 : Ki surok bad ki lynti iaid ki paidbah bad kali ha ka thain Laitumkhrah kila kylluid war ha ka step sngi Nyngkong hadien ka jingpynkynriah ia ki dukan madan sha ka jaka shong dukan madan bala pynbeit da ka Sorkar Jylla.
Ki nongtrei ka Shillong Municipal Board (SMB) ryngkat ki Pulit, kila leit sha Laitumkhrah ha ka por mynstep ban pynkynriah ia ki dukan madan sha ki jaka ba la ithuh ka Sorkar ha madan Brighstarwell kaba don ha Barik bad ka SMP parking Lot ba don ha Dhankheti.
Ha kane ka jingpynkynriah, ki nongshong dukan madan ki khlem ialeh pyrshah bad ym shym la iohi ruh ia ki nongshong dukan madan ba kin pynieng ia ki dukan hapoh ka thain. Kane kala wanjia wat hapdeng ka jingpyrshah jong ki katto katne ki nongshong dukan madan ha ki khyndiat sngi bala leit.
Ki nongkitkam ka Dorbar Shnong Laitumkhrah, ki Seng Kynthei bad ki Seng Samla kila iadonlang ban iarap khmih lem ia ka suk ka sain bad ban khanglad ia kino kino ki jingjia ki bym sngewtynnad.
U Chief Executive Officer (CEO) ka SMB, u KC Boro ula iathuh ba baroh ki nongshong dukan madan ha Laitumkhrah kila mynjur ban kynriah sha ki jaka shong dukan madan bala buh da ka Sorkar.
Ka MLA ka thain Kong Ampareen Lyngdoh ruh kala iadonlang ha kane ka step ban sakhi ia ka jinglong jingman.
