Shillong Rymphang 26: U Myntri Rangbah ka jylla u Conrad K Sangma hynne ka sngi Balang, ula ong ba yn sa pan ia ka por ban iakynduh ia Defence Minister jong ka ri u Rajnath Singh ban kyrpad ban buh ia ki tiar kiba la tip kum ki ‘Instrument Landing Equipment’ ha ki jaka shipai khnang ba ka jylla kan lah ban sdang ia ka jingpynheh ia ka Runway jong ka Umroi Airport.
Haba iakren bad ki nongthoh khubor, u Myntri Rangbah ula ong, “Ka don ka bynta kaba 10-12 akar kaba long shakhmat jong ka Runway, kaba ngi donkam ban ioh ban pynheh ia ka Runway bad na katei, kumba 4 akar ka jaka kadei jong ki shipai bad kumta ka jingiakren ka dang iaid bad ka Sorkar India.”
“Ha ka sien kaba la dep, nga lah ioh ban iakren bad ka jingmih na ka jingiakynduh bad u Rajnath Sing ka long kaba biang bha bad ngan sa pan ia ka por ban iakynduh biang ryngkat bad u Defence Secretary bad u hehduh jong ki shipai khnang ba ngin shim ia ka rai bad ban pyniaid noh shakhmat ia ki kam ki jam” ula ong.
“Ka rai kaba nyngkong ka dei halor ka jingiateh kular ban ia bujli ia ka jaka ia kaba lah ia dep ban mynjur da ka ktien, kumta kan ym mih shuh kano kano ka jingeh. Ka bynta ka ba-ar kadei ba ngi kwah ban pynkloi noh ia ki kam ki jam. Mynta kaei kaba jia ka long ba ka jingbujli jaka kan shim por ia ka 3-6 bnai bad kan shong ruh haduh katno ngi lah ban pynkloi ia ka jingbujli jaka, kumta ngi lah ban sdang noh ia ka kam ban pyniar ia ka Runway” ula ong.
Kane kadei ka por kaba biang bha ban sdang ia ka jingpyniar ia ka Runway hynrei ki don pat ki tiar Instrument Landing Equipment ha ka Buffer Zone hapoh jong ka AAI, mynta ia kine ki tiar donkam ban buh ha ki jaka jong ki shipai. Kumta ngi donkam ban ioh ia ka jingbit ban pyntrei ia ka kam na ki shipai ba kin ailad ia ngi tang ba ngin shu buh ia kitei ki tiar katba ka jingbujli ia ka jaka ka dang don hapdeng ka jingpyniaid shakhmat ia ki kam ki jam bad da ka jingailad ia ngi ba ngin trei ia ka kam, kan iarap shibun ban ym pynlehnohei ia ka 6 bnai lem kumta tang shu poi ka aiom Lyiur ba jur slap, ngin duhnong bad ngin hap ban ap haduh u bnai Nailur, Risaw bad Naiwieng bad ia ki kam kamai da ki liengsuin yn hap ban pynjlan ia ka jingtreikam haduh u snem ban wan” ula ong.
“Kumta nga da kwah bad thrang ba ia kane ka ka kam baroh kin iaid noh shakhmat, khnang ba ngin lah ban buh ia ki tiar ki tar katba ka jingbujli jaka kan dang iaid shakhmat, kumta ki shipai kin hap ban ai noh ka NOC ia ngi, khnang ban sdang noh ia ka jingtei ia ka Runway” la pynkut u Myntri Rangbah.
