Pynskhem ka tamasa ia ka kyrdan ka Meghalaya kum ka jaka long Concert ba hehduh ha India
Tura, Nohprah 07 : Ka Me’gong festival 2025 kala kut hapdeng ka jingshongkun ha ka sngi Saitjain, kaba la khring ruh ia palat 55000 ngut ki nongwan shangkai ha kine ki arsngi bad pynskhem ruh ia ka jingkylla long ka Jylla Meghalaya kum ka jaka ba khlain duh ha ka jingkyntiew ia ka ioh ka kot lyngba ki concert (concert economy) ha Ri India.
Da ka jingiakhleh ki nongput nongtem bad nongrwai ba pawnam ka pyrthei bad napoh ka ri lem bad ki riewdon sap ka thain, kane ka tamasa kala ai ia kawei na ki rynsan iaput iatem, pyni ia ka kolshor kaba shit rhem bha jong ka thain Shatei Lam Mihngi ka ri.
Pynshongshit ki nongrwai ba pawnam ka pyrthei ha ka sngi Ba-ar
Ka sngi ba-ar jong ka tamasa kala khring bun bha ki paidbah da ka jingkiew rynsan ki nongrwai pop ba pawnam ka Brittain- ka kynhun Blue, ka kynhun Yellow Claw, bad u nongwai bad nongthaw jingrwai ba pawnam Prateek Kuhad bad ka khlur Bollywood Kanika Kapoor, kila pynlynguh ia ka madan da ki jingrwai ba pawnam jong ki.
U dkhot ka kynhun Blue u Antony Costa ula iaroh ia ka jingshongshit jong kane ka tamasa bad ong ba ki paidbah ka Me’gong kila shongshit bha. U Simon Webbe ula bynrap “Ka Ri-lum Garo ka dei ka paradise-khublei ia phi baroh namar kane ka jingwan bad ka jingieid”.
Ka Kanika Kapoor kala plie ia kane ka miet ka jingiaput iatem da ka jingrwai ba pawnam bha jong ka-ka Chittiyaan Kalaiyan, Baby Doll, Jawaani Le Doobi- bad kala ai khublei ia ki paidbah ka Meghalaya namar ka jinglong kawei na ki jaka ba sngewtynnad eh na ki jaka ba ka leit rwai.
U Prateek Kuhad ha ryngkat u nongrwai Cold Mess bad Saansein, kila pynkylla ia ka madan daki jingthaba ki light hshuwa ba u Yellow Claw ula pynkut ia ka miet da ka jingtem electronics kaba la pynkhynniuh ia ka madan tamasa ha Bolbokgre-Watregre.
Ha syndak kane ka rynsan, ka Kingfisher ruh kala buh ia ka rynsan iaput iatem da ki nongrwai ba pawnam ka thain ba kynthup ia ka Hoi Hoi Makbil, G-Hill Finest, Crack Gang, Rough Road bad Nokpante.
Ka jingshongshit jong kane ka tamasa kala sdang naduh ka sngi ba nyngkong da ka jingkiew rynsan u nongrwai ba pawnam ka pyrthei –Richard Marx, Julian Marley, Nucleya bad Neeti Mohan.
U Richard Marx, ula pynshongshit ia ka tamasa da ki jingrwai ba pawnam jong u kynthup naduh kiba la rim bad kiba thymmai kiba u dang thmu ban pynmih ha ka thup jingrwai ban sa pynlait shen ba ai kyrteng ka Afterhours.
Ia kane ka tamasa la plie da u Myntri Rangbah ka Jylla Conrad K Sangma, uba la pyrshang katba lah ban pynlong ia ka Meghalaya kum ka jaka pdeng ki tamasa ban pyni ia ka kolshor ki trai Jylla nalor ki concert jong ki nongput nongtem ba pawnam ka pyrthei kum ha ka Me’gong, Shillong Cherry Blossom bad Winter Tales.
Ki nongtem bad nongrwai ba pawnam ka pyrthei kila nang phaikhmat mynta sha ka Meghalaya kum ka jaka ban wan tem ha ka jingwan tour sha India, kaba la pynlong ia ka Jylla kum kawei na ki jaka ba kwah eh ban wan ha India.
 ha Ri India.){kind=link}