Shillong, Risaw 29 : Ka kynhun tem na Sweden ba pawnam bha ha ki 1980 ter ter da ki jingrwai ‘The Final Countdown’, ‘Carrie’, ‘I’ll Cry for you’ bad kiwei kiwei, kan wan biang sa shisien sha India hadien 36 snem bad ha kane ka kynti, kane ka kynhun tem “Europe” kan wan ban pynlyng-uh ha Tura ha ka Me:Gong Festival.
Ka Me:Gong Festival kan long ha ka 29 bad 30 tarik u Naiwieng ha madan Baljel Airport, Tura bad ka dei kaba la wanrah da ka Tnad Meghalaya Tourism bad la pyniaid da ka kompani VAS INC & Ivory Valley.
View this post on Instagram
Ka kynhun tem Europe kaba la bna tam ha satlak ka pyrthei namar ki jingrwai kum ka “The Final Countdown”, “Prisoners in Paradise”, “Carrie”,”I’ll Cry for you”, “Cherokee” bad ‘Superstitious” kan wan sha kane ka tamasa ha Jylla ban pynshong shit ia ki riew ieid jingrwai jong ka Jylla khamtam ka Ri-lum Garo.
Kane ka kynhun kala wan tem khatduh eh ha India ha Mumbai ha u snem 1988.
Kane ka kynhun tem ka kynthup ia u nongrwai Joey Tempest, u nongtem guitar John Norum, u nongtem bass John Leven, u nongtem keyboard Mic Michaeli bad u nongtem dum Ian Haugland. Ka Europe kala pynmih bun ki album kiba iaid iew satlak ka pyrthei kum ka “Out of this World ha u snem 1988 hynrei kala iapaid iapra noh ha u snem 1992. Dei ha u snem 2003 ba kila iatylli biang bad pyllait ia ka album Start from the Dark ha u 2004.
Nalor kane ka kynhun Tem, kiwei pat ki kynhun tem ban pynlyng-uh ia ka tamsa ki kynthup ia ka kynhun tem ba pawnam ka Ri India-ka Indus Creed, Fusion act Shanka Tribe bad Euphoria nalor ki nongtem na Jylla kum ka Da Suraka, Haystack Ladies, Summersalt bad kiwei kiwei.
Kiwei pat ki jingpynbyrngia ha kane ka tamasa ki kynthup ia ki jingshad bad jingrwai nala tynrai ka Jylla Meghalaya, ka jingiakop bam, ka jingiakop pyni riam, ki jingialehkai nala tynrai, ki camping bad kiwei kiwei.
