Dadenggre, Rymphang 23 : U National President ka National People’s Party (NPP) Conrad K Sangma hynne ka sngi Palei, ula khot bad wer ia ki Dkhot jong ki seng sain pyrthei bapher bapher kynthup ka TMC ba kin wan iasoh noh sha ka NPP bad ban ai ka jingkyrshan.
“Kam don jingmut ban kyrshan ia ka TMC ne kiwei kiwei ki party. Ka NPP kala pynkhreh ban thaw ia ka Sorkar. To ngin nym pynsepei kai ia ki vote jong ngi bad ban mih ha kaban vote bad kyrshan ia ka NPP” on gu Conrad ha ka rynsan ialap elekshon ka NPP ha Dadenggre, ban pan jingkyrshan iala u hynmen bad kyrtong ka NPP James PK Sangma, uba dei ruh u MLA ka constituency.
A sea of smiling faces welcomed us at Dadenggre and stood by us in support of our candidate, Sh. James P K Sangma.
Sh. James has proven his mettle as an able leader who is competent to lead Dadenggre Constituency again in 2023. The love shown today is apparent, NPP will win big! pic.twitter.com/DmCQq9cdS4
— Conrad K Sangma (@SangmaConrad) February 23, 2023
Haba khein ia u Nongialam ka TMC bad Myntri Rangbah barim Dr Mukul Sangma kum u Nongialam ba synshar donbor, u Conrad ula ong “U (Mukul) lah ban iasoh sha ka TMC hynrei u dei u juh u briew, uba la pyniap ia bun ngut ki mynsiem ba lui lui. Ka Ri-lum Garo kan ym klet ia ka jingjia ba 30 tarik u Nailur, ha kaba la duh noh haduh 9 ngut ki mynsiem”.
“U Mukul ula ieh ia ka congress, namar ka jingpyrkhat ba um don lawei shuh ha ka congress hynrei u khlem da khein bha ba ki paidbah ka Ri-lum Garo kin nym pdiang ia ka party kaba dei na shabar haba ki don ka lad ban jied ia ka party nala ka jong ka Jylla” ula ong.
Haba kynnoh ruh ba u Dr Mukul ula treikam da kaba pyndonkam ia ka bor bad kiar ia ki jingiakren ha kaban pynbeit ia kino kino ki jingeh ne jingshah tynjuh, u Conrad ula ong ba ka NPP ka ngeit ha kaban sngap ia ka sur jong u paidbah. “Ngin yum leh da lei lei ruh ia ki kam kiba iaid pyrshah ia ka jingangnud u paidbah. Ka NPP kum ka party ka ieng skhem ha ka nongrim ban iada ia ka bha ka miat jong ki paidbah” ula ong.
Ula ong ba ha kine ki san snem kila don shibun ki jingtynjuh hakhmat ka Sorkar hynrei kila don ki khep ruh ba ki kynhun Sengbhalang kila hap ban iakhun pyrshah ia ka Sorkar hynrei ka Sorkar kam ju pyndonkam ia ka bor bad kala jied ia ka lynti jong ka jingiakren ban pynbeit ia ki jingeh jong kine ki kynhun ba iakhih.
Haba niew ia la u hynmen James Sangma kum u Nongialam ba don ka jingkitkhlieh, uba la trei ym tang ia la ka constituency hynrei ka Jylla baroh kawei, u Conrad ula ai khublei ia ki paidbah ka Dadenggre kiba la ai ka jingshaniah ha u.
Ula pyntip ha kane ka jingialang ka project shna surok na Rongram-Dadengre bad Phulbari ka dei kaba la shah iehbein la bun bun snem hynrei u James Sangma ula phah pyntrei biang ia kane ka surok ba thymmai ha ka jingmang tngka ba kot T. 80 klur.
Ula ong ruh ba lada la shah jied ha ka bor, ka jingdawa ban pynkha ia ka District thymmai bad ka Dadenggre kum ka Headquarter, kan dei ka mat treikam ba hakhmat eh jong ka Sorkar Jylla.
Haba kren ha ka jingialang, u James ula ai khublei ia ki paidbah ka Dadenggre kiba la iawan paidbah ban pdiang ia u National President ka NPP Conrad K Sangma. Ula ai khublei ruh ia u Conrad halor ka jingkitkhlieh lem ia ka constituency da kaba ai ia shibun ki kam pynroi ha ka thain.
Ha kane ka rynsan ialap elekshon, la ioh jingkren ruh na ka Kmie u Conrad bad James Sangma ka Soradini K Sangma.
Kane ka kurim u (L) PA Sangma kala kyntu ia ki paidbah ka Dadenggre ban vote ia u khun jong ka. Kala pyntip ruh ba ki paidbah ka Ri-lum Garo kila leh shibun kiei kiei na ka bynta ka Longiing jong ka, kaba u Kurim bala khlad noh, ula bynshet ha ki Khun ba kin trei na ka bynta ki paidbah ka Ri-lum Garo.
