Shillong, Iaiong 10 : U Myntri Rangbah ka Jylla Conrad K Sangma ula ong ba ka Sorkar Jylla ka don ia ka jingthmu kaba shi bha ha ka jingtreikam ban kynthup lang ia baroh.
Haba ai jingkren ha ka ULLAS Fest 2026 ba pynlong ha U Soso Tham Auditorium ha ka sngi Thohdieng, u Conrad ula ong “Nga pyndon burom ia ki toppers ka eksam SSLC hynne ka step bad watla ki dei kiba kongsan bha kumjuh ruh ka long ia ki rangbah ki bym pat nang thoh nang pule, hynrei kiba angnud ia kane, bad, lada ngim lah ban ktah ia ka jingim jong kine ki briew, ka mishon jong ngi kan long ka bym dep pura”.
Kiba iadonlang ha kane ka jingialang ki dei u Myntri ka tnad Pule Puthi bah Lahkmen Rymbui, u Commissioner & Secretary Vijay Mantri nalor ki Ophisar ka Tnad Pule Puthi, ki Nonghikai, ki nongjop ka ULLAS bad kiwei kiwei.
U Myntri Rangbah ula pynpaw ba ka ULLAS ka dei ka prokram kaba don burom bad ong ba bun ki briew kim don ia ka kabu ban long kiba la nang thoh nang pule hynrei kane ka prokram kala poi sah kiti kiba angnud ban pule bad thoh. Ula kyntu ia baroh ba kin iatreilang ha kaban lah kynjoh ia ka jingdon ki briew bala nang thoh nang pule sha ka 100%.
“Ngi la jan kot ia ka 100% ka jingdon ki nongshongshnong ba nang thoh nang pule hynrei ngi hap ban iatreilang kum ka imlang sahlang ban wanrah jingkylla ha ka pule dangle haba pynkupbor ia baroh ki briew ha ka imlang sahlang” ula ong.
U Myntri Rangbah bad kiwei ki kynrem ki lyndan, kila pynkup burom ia ki ULLAS Achievers bad ki ULLAS learners kiba la rangbah duh ka rta na ka thain Khasi bad Jaintia.
Ka ULLAS (Understanding of Lifelong Learning for All in Society) scheme ka dei ka prokram ka Sorkar Pdeng jong u snem 2022-2027 ban kyntiew ia ka pule dangle bad ka jingai jinghikai ia kiba la rangbah (15 snem shaneng), kiba duh ia ka lad ban leit skul.
