Khot u CM ia ka HNLC ban wanphai biang sha ka jingiakren iasuk

Shillong, Kyllalyngkot 15 : U Myntri Rangbah ka jylla u Conrad K Sangma hynne ka sngi Balang ula khot ia ka kynhun kieng atiar Hynniewtrep National Liberation Council (HNLC) ba kan wanphai biang sha ka jingiakren iasuk ban pynbeit ia ki mat kiban pynthikna ban don ka jingsuk jingshngain kaba neh slem ha ka jylla.

Haba iakren bad ki nongpathai khubor, u Conrad Sangma ula ong ba ka jingkhang jong ka sorkar ka long beit kaba plie na ka bynta ban iakren iasuk bad ka kynhun kieng atiar.
“Ngi iawer ia ka kynhun ban wan iakren bad ngi dap da ka jingkmen ban plie lad biang ban pyniaid shakhmat ia ka jingiakren kumba ngi lah leh ha ka por kaba la dep” la ong u Conrad haba kdew ia ka jingiakren iasuk ha ka wat aba nyngkong kaba la long ha u snem 2023 bad ka HNLC.

Ula ong ba kiei kiei kim shym la lah shuh ban iaid shakhmat hadien ba ka kynhun kieng atiar kala rai ban weng noh ialade na ka jingiakren iasuk ha u Kyllalyngkot jong u snem ba la dep.

“Lada ngi kwah shisha ban iaid shakhmat, ngi hap ban weng ia kito ki jingeh bad ki jingtynjuh bad kane kadei tang kata ka lynti ban lah ban pynbeit ia kitei ki jingtynjuh da kaba iakren bad iatai bad ban wad ia ki lad ki lynti. Kumta ngi kyntu ban peit ba ki don ki jingtynjuh, ki lah ban don ki bynta bad ki diengpynkiang kiba lah ban mih, kan dei kaba ju jia ha kino kino ki jingiakren ne jingiasyllok hynrei katei kam dei ban pynduh mynsiem noh ia ngi, dei ban pynthikna ba kan pynlong ia ngi kiba iengskhem ban ong ba ngi kwah iaka jingsuk kaban neh shi rta bad ngi kwah ba ia kitei ki mat baroh dei ban shimkhia bad haba mih kano kano ka jingsngewkhia na ka liang ka jongki, ngi donkam ban ia shong ban ia pyrkhat katkum ka rukom treikam jong ka riti synshar ka ri, hapoh ka jingiakren bad ka MHA bad ka sorkar jylla bad ka kynhun ka jongki ngi dei ban iaid shaphrang.

“Kane kadei ka jingkyrpad ka jong ngi, ngi kwah ban phah biang ia ka khubor sa shisien ba ngi long kiba kloi ban iakren bad to ngin ia leit sha ka miej ban iakren bad kino kino ki jingsngewkhia kiba don, kaba bha tam ban pynbeit ia kitei ki jingsngewkhia kadei lyngba ka jingiakren” la ong u Myntri Rangbah.

Halor ka jingdawa ka HNLC ban map noh ia ki kam bymman, u Myntri Rangbah ula ong, “Ia kane ka bynta la iakren la bunsien. Na ka liang jong ka Sorkar India kala kdew ba kan ym lah ban pynbna noh ia katei mynta hi, namar ba ki don katto katne ki case, ki ain, ki kyndon kiba la don lypa naduh ki por kiba la leit, kumta kala don pat ka lynti ban iaid shakhmat”.

“Ngi ong ba ngin iakren ia katei ka bynta. Ki don katto katen ki kam bymman kiba la leh, ia kaba ki kyndon ain kila don lypa na ka bynta ka jong ngi kum ka sorkar jylla. Ngim lah ban shu ong ba ia baroh kiei kiei lah pynduh lut, ngim lah ban leh ia kata, ka hap ban wan na ka sorkar India ban iakren ia kane hynrei lada phi kwah ban iakren ia katei, ngi hap ban ia shong. Hynrei hashwa ba ngin ia shong, phi lah pan ban map noh ia ki kam bymman kiba la leh, kumno ngin sdang ia ka jingiakren kadei kba nga kwah ban ong” la pynpaw u Conrad.

“Haba ngi iatai bad iakren, kumta kitei ki mat baroh kin sa mih badlah ban iakren ia katei ia ka mat hynrei hashwa ban sdang ka jingiakren kumno la buh lypa ia ki kyndon bad ia ka sorkar India ba kan leh ia tei ka long ka bym lah” ula ong.

Ula pynthikna ba ka sorkar kan pyrshang ia kaba bha tam ban iakren ia katei ka mat bad ka sorkar India.

“Kadei kaei kaei kaba ngam lah ban ai ia ka jingkular na ka liang jong ka sorkar India namar ba ka MHA kadei ka tnad jong ka sorkar pdeng bad hap ban leh ia katei ha ka kyrdan ka jong ka” la ong u Myntri Rangbah.