Shillong Jymmang 16: U Myntri Rangbah ka jylla u Conrad K Sangma hynne ka sngi ula pyntip ba ka sorkar kan sa lum ia ka jingialang bad baroh ki seng sain pyrthei ha ka 19 tarik ban iakren ha kaba iadei bad ka Reservation Policy lem bad ka jingpyntreikam ia ka Roster System.
“Ngi lah dep pyntip ia baroh ba ka sorkar ka dang pynkhreh ia ka jingbatai ba bniah (detail presentation) bad nga la iohi ia kaba sdang khyndiat jong katei ka ningbatai bad shisien ba baroh kila iohi ia ka kin sa sngewthuh shai kdar bad yn weng syndon iaka jingbym sngewthuh ka jongki”.
“Lashai ka sngi kan don kan don ka jingpyni bniah ia katei ka presentation ha ka jingialang jong ka kynhun myntri bad hadien kane ha ka 18 tarik ngin don ka jingialang jong ka sorkar synroplang Meghalaya Democratic Alliance bad ha ka 19 tarik yn lum iaka jingialang bad ki seng sain pyrthei ban iatai sani” ong u Conrad.
Ula iathuh ba ha ka taiew ban wan pat yn lum ia ka jingialang bad ki kynhun sengbhalang, nongialam niam bad ki khlieh nongsynshar shnong ban batai shai shaphang ka Roster System.
“Ka jingeh kaba mih kadei ba bun kim sngewthuh eiei shaphang ka Roster System. Ka Roster kadei kaba suk hynrei ban sngewthuh pat iaka, ka long kaba kyllain hynrei nga ngeit skhem ba shisien ba kila iohi iaka presentation kin sngewthuh shai bha bad kin sngewhun ruh”
Ha kaba iadei bad ka jingdawa ka VPP ban pynmih iaka jingpynbna ban pynsangeh ia ka jingthungkam katba ym pat khmih bniah iaka Roster System bad Reservation Policy, u Myntri Rangbah ula ong, “Ki seng sain pyrthei ki lah ban kren kat kaba ki sngewkwah hynrei ka sorkar jylla ka hap ban iaid katkum ki kyndon jingbthah bad kan bud beit ia ki kyndon jingbthah ha baroh ki liang.
