Shillong, Iaiong 5: Kan long shisha ka jingkyrkhu kaba khraw ia ki paidbah jong ka jylla Meghalaya namar ba ka jingangnud kaba la slem bha mynta, kan wan urlong hadien ba ki bor ba dei khmih jong ka Airports Authority of India (AAI) kila khot ‘Tender’ ban pynheh ia ka kad liengsuin jong ka Shillong Airport.
Kane ka sienjam kala wan urlong, kadei na ka jingtrei shitom jong ka sorkar ia kaba la lam khmat hi da u Myntri Rangbah ka Jylla u Conrad K Sangma uba la buh ia ka thong kaba hakhmat eh ha kaba iadei bad ka kad liengsuin.
Ka jingpynheh ia kane ka kad liengsuin kan dei 571-mitar na kaba la don lypa bad kane ka poi haduh 2,400 mitar ka jingjrong bad kane kan pynsuk ia ka jingiaid ki liengsuin A-320 ha Shillong.
Ha kaba iadei bad kane ka project kan kynthup lang ia ka jingpynheh ia ki Terminal Building bad ki Apron, ha ryngkat bad kiwei de ki jait jingtei, katkum ka Tender Notice, ka mang tyngka ban pynheh ia kane ka liengsuin ka long T.119.44 Klur bad ka por ban pyndep ia kane ka long khatphra bnai.
Na ka liang u Myntri Rangbah ka Jylla u Conrad K. Sangma ula ong, “Kane kadei ka khyllipmat ba sngewkmen bad kaba khraw na ka bynta ka jylla Meghalaya. Kane ka jingpyllait Tender ban pynheh ia ka Shillong Airport kadei u soh jong ka jingtrei shitom ha kine ki snem kiba la leit bad kane ka wanrah ka jingkylla ha kiba bun ki liang, kum ha ka kam jngohkai pyrthei bad kan plie ruh ia ka lad ioh kam ioh jam ia ki khun samla jong ka jylla.”
Naduh ba u Myntri Rangbah u shimti ia ka shuki u la rah ia kane ka mat ban pynheh ia ka Shillong Airport bad ka Sorkar Pdeng ha kiba bun ki bynta bapher bapher. Kane ka project kadei ka jingangnud jong ka jylla ban kylla long kum ka jaka jngohkai pyrthei hapoh ka ri.
Ka AAI kala dep ban aiti ia ka Master Plan kaba kala pynkhreh na ka bynta ban pynheh ia ka kad liengsuin ha u Nailar jong u snem 2024 bad ka jingshim jaka ban pynheh ka long haduh 22 akar bad ka kam mynta kala iaid shakhmat. Kane ka jingthmu ban pynheh ia ka kad liengsuin kadei ka jingiohi jngai jong ka sorkar ban dang kyntiew shuh shuh ia ki kam jngohkai pyrthei bad ia kiwei de ki jingtei.
Ka sorkar Meghalaya kala buh ia ka thong ban pynlut ha ka kam jngohkai pyrthei kumba 4,000 hajar klur ban shna ia ki jaka jngohkai pyrthei kiba thymmai bad ruh ban pynbha ia kiba la rim. Ka sorkar kan trei shitom ban pynioh ia ki nongbei tyngka ban shna thymmai ki Resort kum ha Umiam, Shillong bad ha New Shillong bad kane ka plie ka lad ioh kam ioh jam ia ki samla ka jylla.
Ha u bnai Nohprah 2024, ka sorkar kala dep ban buh ia u maw nongrim na ka bynta ka Shillong Ropeway Project, hapoh ka jylla ka ban kit briew da ka jingthmu ban pyniasoh bad ki jaka jngohkai pyrthei ha kylleng ki jaka ha sor Shillong ban kyntiew ka kam jngohkai pyrthei bad ka leit ka wan ha sor.
 kila khot ‘Tender’ ban pynheh ia ka kad liengsuin jong ka Shillong Airport.){kind=link}