Shillong, Naiwieng 08 : Ka Sorkar Jylla kala rai ban khot ia ka Harijan Panchayat Committee (HPC) ban iakren pynbeit khatduh noh ia ka jingtyrwa ban pynkynriah noh ia ka Them Metor na Them Iew Mawlong ha ka 16 tarik Naiwieng.
Ia kane la pyntip da ka Sorkar Jylla hapoh ka Iingkashari Meghalaya High Court kaba shong bishar ia kane ka mukotduma hynne ka sngi Balang.
Ha ka hukum, ka Division Bench ba kynthup ia u Justice W Diengdoh bad Justice B Bhattacharjee kala ong ba u AG ula pyntip ba ka jingtyrwa kala wan na ka Sorkar Jylla ba kan khot ia ka HPC sha ka jingialang khnang ban lah pynbeit noh shisyndon ia ki jingiakajia lane kino kino ki kam ba sahteng hapdeng ki arliang mamla.
Halor kane, u AG ula pyntip ba ia kane ka jingialang la tyrwa ban pynlong ha ka 15 tarik ne 16 tarik u Naiwieng, 2023. Hynrei, ula pyntip ruh ba lada ka HPC ka pynpaw ba kan ym lah ban wan sha ka jingialang ha kine ki sngi, ka lah ban tyrwa ia kiwei pat ki sngi khnang ban ailad ia ki kynhun manla ba kin iashong bad iapynbeit noh ia ki kam baroh.
Ka Iingkashari kala ong ba ia mynta, kan ym pyniaid shuh shakhmat ia ka mukotduma hynrei kan ap ia ki liang manla ba kin iakynduh kumba kila tyrwa.
“Ia ka jingmih na kane ka jingialang dei ban pyntip bad wanrah hakhmat ka Iingkashari ha ka dur jong ka kaiphod. Namar kata, buh ia kane ka kam ban shong bishar biang ha ka taiew ba nyngkong u Nohprah, 2023” kala bynrap.
Ha ka 29 tarik Nailar, ka Sorkar Meghalaya kala pyntip ia ka Iingkashari ba kala mynjur ban nang pynbun ia ka jingai jaka ban shna iing kumba la kyrpad da ki longiing kiba sah ha Them Metor.
Lah ban kdew hangne ba ka Sorkar ha ka blueprint kala tyrwa ban pynkynriah ia ki 342 tylli ki Longiing ka Them Metor sha ka jaka jong ka Shillong Municipal Board.
