Nongpoh, Rymphang 13 : Ka Ri Bhoi District Cricket Association ka la pyntip ba kan pynlong da ka Open Trial ne ka jingjied ia ki samla donsap ha ka kam ialehkai kriket na baroh ki jaka, ka ban pynlong ha ka 15 tarik u Rymphang.
Ia kane ka Open Trial yn pynlong naduh ka por 9 baje mynstep ha ka madan ialehkai kriket ha Pahamsning Nongkhrah, Nongpoh.
Katkum ka kyrwoh na u President ka RBDCA, Bah Rayonald Kharkamni, la pyntip, ba ia kane ka open trial yn pynlong na bynta ban jied ia ki samla ialehkai kriket kiba hapoh ka 15 snem ka rta na bynta ki kynthei bad kiba hapoh ka 16 snem na bynta ki shynrang.
Ka jingpynlong ia kane ka Open Trial kan long ruh shibynta ban ioh jied ia ki rang bad ki thei ialehkai kriket kiba kynsai ban mihkhmat ia ka kynhun jong ka Ri Bhoi District ha ka lympung ialehkai kriket Inter District Level Cricket Tournament 2025 ka ban pynlong shen da ka Meghalaya Cricket Association.
La pyntip ruh, ba ki samla ki ban ia shimbynta ha kane ka trial ki donkam ban wanrah lang ruh ia ka Birth certificate, Aadhar Card na bynta ka jingpynshisha ia ka ryta ka jong ki.
