Shillong, Jymmang 06 : U National Vice President ka National People’s Party (NPP) bad Symbud Myntri Rangbah ka Jylla Bah Prestone Tynsong, hynne ka sngi Saitjain ula ong ba ka party kala khot ia baroh ki seng sain pyrthei ba lada long kaba lah ban wan iabynrap lang (merge) noh sha ka party.
“Nga khmih lynti ba bun (seng sain pyrthei ban wan bynrap lang no bad ngi). Ngi la khot ia baroh ki seng sain pyrthei ba lada ki lah ban wan iabynrap lang noh” ong u Bah Prestone haba iakren bad ki nongthoh khubor.
Kane ka jingkren jong u kala mih hadien ba ka PDF bad ki arngut ki MLA-Bah Gavin M Mylliem bad Banteidor Lyngdoh, kila wan bynrap lang noh kawei bad ka NPP hynne ka sngi.
Haba pynpaw ba ka jingkhang jong ka NPP ka long kaba plie ia baroh, u Bah Prestone ula ong “Ngi khot ia baroh ki seng sain pyrthei. Balei ba kin iabud ia kaei kaba ka PDF kala leh…sngeewbha iasnohkti bad wan iabynlang lang noh bad ngi”.
Haba kylli, une u Nongialam ka NPP ula ong “( Ym tang ka UDP) ka kynthup ia baroh, wat ka BJP ruh ka lah ban wan iabynrap lang noh kawei bad ngi. La ka lah ban long ne em, ka dei ka kamram jong ngi ban khot ia baroh ki seng sain pyrthei”.
Hynrei u Bah Prestone ula kyntait ban kynthoh la ka Jyla kan sakhi ia ka jingkylla ka sain pyrthei hadien ka elekshon Sohiong bad ong “Ngan nym ong eiei ia mynta namar nga iohi ba ka jingkylla ka sain pyrthei ka jia manla ka sngi lane lehse man ka taiew…ta ka daw ngan nym ong eiei halor kane”.
Haba pynpaw ba ka UDP ka dei shibynta jong ka Sorkar MDA-2 ba ialam da ka NPP, u Symbud Myntri Rangbah ula ong “ia mynta hooid ki (UDP) don bad ngi bad ki dang iai bteng bad ngi hynrei ngam tip ia kaban sa wan. To ngin sa iapeit kumba ka iaid bad ha katei ka por ngan sa lah ban iathuh ia phi”.
