Shillong, Jymmang 06 : U Myntri Rangbah ka Jylla Conrad K Sangma hynnin ka sngi Saitjain, ula ong ba kam don satia kata ka kyntien ‘Prospective’ (nangne shakhmat) lane ‘Retrospective’ (naduh ki snem bala leit) ha ka jingpyntreikam ia ka Roster System jong ka Job Reservation Policy ka Jylla.
Haba kylli halor kane ka kam, u Conrad ula iathuh ia ki lad pathai khubor ba ki don bun bah ki briew ki bym pat sngewthuh ia ka Roster System baroh kawei bad kumta, ka Sorkar Jylla kan sa ai ka jingbatai khnang ba kin paidbah kin iatip.
“…hadien ba ngi lah dei ai ka jingbatai sha baroh, baroh kiei kiei kin sa shai kdar. Ka Roster System ka dei ka Schedule (jingpynbeit por) ba phi thaw hi bad kane ka schedule ka dei ia kaban pyntrei kat kum ka jingpyntreikam ia ka Roster lane ka schedule kaba la don lypa” ong u Conrad.
“….namar kane ha ki snem bala leit noh ngi la iohi ba ka jingthungkam la leh halor ka jinglait ki kam katba ka jingthungkam ha ka jingshisha ka dei ban leh halor ka jingdon ki kam” ula bynrap.
U Myntri Rangbah ula bynrap ba ka Roster kan treikam kat kum ka Roster System kaba la dep thaw bad kane kan sa mih.
“…hadien ba ngi la ai jingpynshai sha baroh kumba nga ong, ka Tnad ba dei khmih bad ka Sorkar kila trei shitom halor kane ka kam baroh….hadien ba ngi la lah ban pynshai ia kane sha baroh, nga kyrmen ba kane ka kam kan sa shai noh” ong u Myntri Rangbah.
