Shillong, Rymphang 04 : Ka Jylla Meghalaya kala khot ia ki nongkynshew kam shimet ba kin wan trei ia ki project pynmih bording ha Jylla ban lah pyndap ia ka jngnang kiew ka jingdawa bording.
Ia kane la pyntip da u Myntri ka Tnad Bording AT Mondal haba iathuh “Ngi la pynmih jingpynbna ia ka Power Policy ba thymmai, kaba pynshlur ia ki nongpynmih bording shimet ba kin kynshew kam. Ka jingdawa bording kala nang kiew bad ngi dei ban pynthikna ba ka dei kaba lah ban siew, ka bording ba pynmih hi na Jylla” ong u Mondal.
Ka Jylla kala dep ban soi ia ki project Hydel Power sha ka NEEPCO hynrei ki jingiakajia kam jaka kila pynslem ia ka jingiaid jong ka kam. “Ka project ba 85MW, ba khot ka “Wah Umiam” ka hap hapdeng ka Shella bad Mawsynram Constituency. Ngi kyrmen ban lah pynbeit noh kloi ia ki jingiakajia jaka” ula bynrap.
U Mondal ula ban jur ia ki jingmyntoi ban ioh na ka jingwan pyntrei project pynmih bording da ki nongkynshew shimet bad ong “Ka Jylla kan ioh ei 12% ka bording bad 1% ia ki kam pynroi ha ka thain ba don ka project. Namar ka jingnang kiew ka jingdawa bording ba kot haduh 11% ha ka shisnem, ngi dei ban lah pynmih nalade ia ka bording ha ka jaka ban shaniah na kaba shu thied nabar” ula batai.
Haba kylli halor ka jingpyniadonbynta ia ki kompani shimet, u Mondal ula pynthikna “Bun tylli ki MoU ki dang sahteng bad katto katne ki kompani ki dang bunkam ia kane. Ngi long kiba la pynkhreh ban iasoi ia ka soskular thymmai ha kano kano ka por. Don katto katne ki MoU kiba la sahteng la palat shiphew snem hynrei ki nongkynshew kam thymmai kila nang wan shakhmat mynta” ula ong.
“Katba ka Jylla ka dang ioh ei ia ka bording, ngi long kiba kloi ban iatreilang” ula bynrap.
Haba weng ia ka jingsheptieng ioh kiew ka bai bording elekrtik, u Mondal ula pynshai “Ia ki Hydel Project, ngi ioh ei haduh 12 % ka bording, kumya ka bai bording kan ym shah ktah satia. Ka Regulatory Commission kan sab uh ia ka bor bad 1% ka bording yn ai sha ki kam pynroi ha ka thain”.
