Khot ka KSU ia ki samla: Pynsangeh noh ka jingaiwai ha ki Bar Jylla ban pyniaid ia ka Jylla

Date:

Share post:

Shillong, Naitung 24: Ka Khasi Students Union (KSU) Sengkmie kala khot ia ki samla ka Jylla ba kin ieng rasong noh da kaba shut pynnep ia ka jabieng khnang ban lah pynsangeh noh ia ka jingaiwai ha ki bar Jylla ba kin pyniaid ia ka bor treikam (Administration) ha ka synshar khaddar hapoh ka Jylla.

Kane ka sur kala mih na u President ka KSU samla Lambokstar Marngar ha ka jingialang pynkup burom ia ki samla pule ba pass bha – ka “1st Maitshaphrang Academic Award 2021-22” bala pynlong da ka KSU-Nongtyngur Unit, kaba hap hapoh ka KSU South Central East Circle, Pynursla hynnin ka sngi saitjain.

“Ki samla ki dei ban rai nangne shakhmat ba ngim dei shuh ai wai shuh ban pyniaid ia ka jylla sha ki briew kiba na shabar ka Bri u Hynñiewtrep. Haduh mynta mynne, ngi dang ai wai sah ia ka bor treikam kum ka kyrdan ki IAS, IPS bad IAS sha ki briew kiba nabar ka jylla bad lada ngi dang ai wai sah kumne, kan sa buh ha ka jingeh kaba khraw ia ka Ri bad ka Jaidbynriew ha ki sngi ban dang wan” ong une u Nongialam ka KSU.

U la pynkynmaw ba ki samla Khasi kim dei satia kiba duna ka jabieng bad ki jingmut jing pyrkhat ban kynjoh lem sha ka thong kumba long kiwei kiwei pat ki Jaidbynriew.

“Ngi don ki samla kiba tbit, kiba shemphang bad kiba ia ryngkat kyrdan bad kiwei pat ki Jaidbynriew hynrei ki duna iaka mynsiem iakhun dohiap. Ki don ruh ki samla ki stad bha hynrei ka lad kam plie” ula ong

“Dei na kane ka daw ka KSU ka la shim ia ka sienjam ban jied ia ki samla pule ka jaitbynriew ki ba stad ban phah shabar ka jylla ban leit pyntbit ha kaba ia dei bad ka Civil Service Examination bapher khnang ba ki samla ka jaitbynriew kin ioh bat hi noh ia u shabuk ha ka synshar khadar hapoh kane ka Ri” ula bynrap.

Haba pynpaw ba ka Jaidbynriew ka Bri u Hynniewtrep kam pat dei kata ka jaidbynriew kaba duk, une u Nongialam ula ong “Kaba donkam ka dei satang ka jingtrei shitom, ka jingpynleit jingmut khop ha ka jingminot thop ban poi sha ka thong bad ka jingangud bad ruh ka mynsiem len lade ha kano kano ka kam”.

U President ka KSU u la pynpaw ruh ia ki jingbynñiaw namar jingshongkha khynnah ha ka Jaitbynriew bad ong “Kane ka dei kawei na ki daw ka jingkhyllem noh jong ki samla ban poi sha ka thong namar ki samla ha ka jaka ban pyndep ia ki Degree ha ki jingpule hynrei kiba bun ki pass pynban da kiwei pat ka degree kata ban iohkhun ioh kti. Kane ka dei ka jinghiar jong ka jaitbynriew” ula ong.

U Bah Ryngkatlang Lyndem, MDC Lyngkyrdem-Laitkroh Constituency kum u symbud kongsan u la pynpaw ba udei uwei na ki dkhot barim ka KSU Laitlyngkot Unit bad u la ia trei bad ka KSU ha shibun bah ki kam naduh ka por ba u la long kum u Rangbah Shnong bad wat haduh kane ka kynti ba u la long u MDC.

U la ong, ka jingduk kam dei satia ban long ka daw ka jingrandien noh jongki samla ha ka pule puthi bad ban trei ia kino kino ki kam kiba myntoi ia ka imlang sahlang.

Ha kane ka sngi, ka KSU ka la ai sngewbha da ka khusnam jingithuh kyrpang ia ki nongtrei mon sngewbha kiba kynthup ia ki nongiarap ban maramot ia ki jingkieng jri, kiba ka seng ka lah shimti ban sumar sukher, ia ki Rangbah Shnong bad ki Sordar Raid kiba don hapoh ka dong ka thaiñ kum ka dak ka jing-ithuh kyrpang bad ka jingai mynsiem na ka bynta ki kam shakri paidbah ba kila lah ban synñiang ia ka imlang sahlang bad ia ka jaidbynriew.

Share post:

spot_img

Popular

More like this
Related

Conrad presents Meghalaya’s first-ever ‘climate action budget’, allocates Rs. 3412 cr

Shillong, March 23: The Meghalaya Democratic Alliance (MDA) government...

Kyntait u CEM ka KHADC ba ai NoC iaka lynti rel Tetelia-Byrnihat-Shillong

Shillong, Lber 23: U Chief Executive Member (CEM) ka...

Dawa tuklar u MLA/MDC ia ka KHADC ba lum khajna ka KAAC na ki nongrep synsar ha Block-II

Shillong, Lber 23: U MLA bad MDC ka Mawhati...

Khang ka EWKH ia ki ksai khleh manjha ba pynher kotkudi

Shillong, Lber 23: U District Magistrate ka Eastern West...