Shillong, Lber 06 : I MLA ka NPP na East Shillong Kong Ampareen Lyngdoh hynne ka sngi nyngkong, ila kyntu ia ki MLA kynthei ba kim dei ban ailad ia ka politics seng sain pyrthei ba kin pyniakhad ia kaei kaba ia angnud lang ban leh.
“Ngim dei ban ailad ia ka politic seng sain pyrthei ba kin pyniakhlad ia kaei kaba ngi iakwah eh bad ka thong ban kyntiew ia ki Kynthei hapoh ka Jylla Meghalaya” ong I Kong Ampareen haba iakren bad ki nongthoh khubor hadien ba bamsmai kum I MLA ba pura ka Iingdorbar Thaw Ain ka Jylla.
Haba shim ia ka jingduna ka jingmihkhmat ki Kynthei ha Iingdorbar kum kaba sngewsih, ine I MLA ka East Shillong ila ong “ Ka jingdon ki MLA kynthei kala duna na kaei kaba ngi don ha ka samoi ba la dep. Ngi don saw ngut ha ka samoi baa dep bad mynta ngi la don biang satang 3 ngut”.
Ila phaikhmat ban iatreilang bad kine ki arngut ki MLA Kynthei ha Iingdorbar Thaw Ain halor ki kam kiba iadei bad ki Kynthei hapoh ka Jylla.
I kong Ampareen ila pynpaw ruh ia ka jingsngewkhia halor ka jingshngain bad ka jingiada ia ki Kynthei bad ki Khynnah hapoh ka Jylla.
“Ka jingshngain ka dei ka kam kaba baroh ki sngewkhia jur bha ha Jylla. Ngi dei ban pynthikna ba baroh ki Kynthei kin sngew shngain haba ki iaid ki ieng ha ki surok” ila ong.
Haba kylli, I kong Ampareen ila ong “Ka shong ha ka kam ka ban sa bynshet ha nga. Ngam pat tip satia ia kaei ka kam ban sa bynshet bad ba nga hap leh. Ngin sa peit kumno ka kam ka iaid bad ngin sa sdang ban trei”.
Haba pynpaw ia kajuh ka jingsngew, I MLA ka Sutnga-Saipung Kong Santa Mary Shylla ila ong ba ki Kynthei kila sdang ban mih shakhmat ban iashimbynta ha ka kam sain pyrthei.
“Ngi kyrmen ba ha kine ki san snem ban wan, ngin sa nang iohi bun ki Kynthei ha Iingdorbar Thaw Ain” ila ong haba pynpaw ba ka kam ba hakhmat eh jong I kan ong ban pynshlur ia ki Kynthei.
Ila pynpaw ruh ba ila buh hakhmat duh ia ka kam ban pynbha ia ki surok hapoh ka constituency ba I mihkhmat.
