Nongpoh, Jymmang 23 : Ka Dorbar Shnong Pyllun ka Erpakon, kala ieng skhem beit triang halor ka rai ban beh krad lut ia baroh ki bar jylla kiba trei bylla bad sahwai hapoh u pud u sam ka Shnong namar ka jingshah pyniap u trai shnong dang shen.
Ka Dorbar Shnong Erpakon kala pynsngew ia kane ka rai hadien ka jingialang pyniasuk (peace meeting) bala khot pynlong da u Deputy Commissioner ka Ri-Bhoi District, hynne ka sngi Palei ha Nongpoh.
Kane kala mih ruh tang shisngi hadien ba ka Shnong Erpakon kala pynbna ia ka rai jong ka Executive Committee kaba shong jingialang hynnin ka sngi Balang.
Ha kane ka jingialang la iashimbynta ruh da ka Synjuk ki Rangbah Shnong ka Ri-Bhoi District, ka Dorbar Shnong Erpakon, ka Seng Longkmie bad Seng Samla ka shnong Erpakon bad la pyniaid ia ka jingialang da ka Magistrate B Pakyntien ha ka jingiadonlang u EAC Bah Eric Kevin Dkhar, u DySP Bah PS Marweiñ bad kiwei kiwei.
Haba kren sha ki lad pathai khubor hadien ka jingialang, u Rangbah Shnong bad Secretary Shnong ka Erpakon Bah M Thongni bad Lamborlin Kharshilot, kila pyntip ba ka jingkhot iakren jong ka Ophis u Deputy Commissioner ka long eh halor ka jingshah pyniap u Kyrmen Lyngdoh Nonglait bad ka rai bala shim da ka Dorbar Shnong ban beh noh ia ki bar jylla.
Ki iathuh ba kala mih ruh ka jingkyrpad ban pynjai jai noh ia ka jingbitar jong ki nongshongshnong halor katei ka jingjia.
Hynrei ki ong ba ka Shnong kumba la rai da ka Dorbar, kan ieng skhem beit triang halor ka rai ban nym ai NoC shuh ia ki bar jylla ban sengkam happh Shnong bad ban nym ailad shuh ia ki bar jylla ban wan trei bylla hapoh u pud u sam ka shnong.
Kila iathuh ba ka rai ban phah khang noh ia ka RN Sharma Hotel bad phah mih noh ia u trai lem bad ia ki nongtrei bar jylla baroh, kan dang treikam beit kumba la rai.
 bala khot pynlong da u Deputy Commissioner ka Ri-Bhoi District, hynne ka sngi Palei ha Nongpoh.){kind=link}