Shillong, Lber 21 : Ka Iingkashari Distrct ha Shillong, kala phah ia ka shithi khot hajir ia ki arngut ki nongleh YouTube halor ka mukotduma bai mynrain khmat bala mudui da u Deputy Speaker ka Iingdorbar Thaw Timothy D Shira halor ka khubor winter capital ha Tura.
U Timothy D Shira ula mudui ia kane ka mukotduma bai mynrain khmat ha ka 12 tarik Lber pyrshah ia ka Mikkanchi R Sangma na Assam bad u Balsrang Marak ba na Ri-lum Garo, haba dawa ba ki dei ban siew mar T.100 klur namar ka jingpynmih bakla ia ka jingkren jong u halor ka Winter Capital hapoh ka Iingdorbar Thaw Ain.
La bthah ia kine ki nongleh YouTube ba kin wan mih hakhmat ka Iingkashari ha ka 9 tarik Jymmang lem kumta ka jing bishar kan iaid khlem ka jingdon jong ki.
Ka shithi khot hajir ka ong ba kine ki arngut ki dei ban wan dalade lane buh da ki nongiasaid ain ba kin jubab ia ki jingkynnoh.
Ka mukotduma bala mudui hapoh ka Defamation suit No 1.(H) of 2025, kan batai la kine ki nongshah kynnoh ki ieng halor ki jingkam jong ki bad ai ia ki sakhi satar bad ki nongaisakhi. Ka Iingkashari kala maham ba lada ki nongshah kynnoh ki kubur ia ki jingkam, ka kashari ka lah ban pynmih hangto hangto ia ka rai.
Kane ka jingai mukotduma kala mih na ka jingkynnoh ba kine ki arngut kila edit bad pynsaphriang ia ka video ba ialam bakla, kaba pyni ba u Timothy D Shira u pyrshah ia ka jingtyrwa ban pynlong ia ka Tura kum ka Winter Capital ka Meghalaya. Kane ka video kala pynmih ia ki jingshah kynthoh ba lai phew jait ha ki paidbah, kaba la pynbor ia u Deputy Speaker ban shim ia ka sienjam jong ka ain.
