Shillong, Iaiong 05: U nongialam ka United Democratic Party (UDP) u badei ruh u myntri ka sorkar jylla u bah Kyrmen Shylla hynne ka sngi ula ong ba ka UDP kan sa kiew haka jingjop bun ki MLA ha rilum Jaintia Hills ha u snem 2028.
Lah ban kdew ba ka UDP ka lah ban jop biang ha 3 tylli ki konstitwensi kata ha Khliehriat East Jaintia Hills bad ha Amlarem bad Mokaiaw West Jaintia Hills katba ha ki 4 tylli ki konstitwensi la jop hi daka National People’s Party (NPP).
“Ka party kan nang trei shitom bad khamtam ki nongialam ka Jaintia Hills kin hap ban trei shitom naka bynta ban pynthikna ba ka UDP kan jop kham bun ki konstitwensi ha ka ilekshon 2028 bad ki briew ruh kin pynthikna ba ka Party kan jop kham bun ki Seats” la ong u bah Kyrmen.
U bah Kyrmen ula pynkynmaw ba ka UDP ha u snem 1998 kala jop lut ha baroh 7 tylli ki Seats hynrei mynta ka kynti kala don bun ki jingkylla namar ka sain hima ruh kala kylla bad kiei kiei baroh kila kylla.
U bah Kyrmen ula ai khublei ruh iaki paidbah jong ki 3 tylli ki konstitwensi kiba la pynjop iaka UDP bad kiba la ai lad biang iaka Party ban shakri ia ki paidbah ha kine ki konstitwensi.
Haba kylli halor ka Voice of the People Party (VPP), u bah Kyrmen ula ong ba tang ki paidbah kiba dei ki nongpynkylla iaka sain hima ne iaka Party.
“Lada ki kwah ia ngi kamut ka buh jingma hynrei nga shaniah ba ki paidbah ki dang plie lad iaka UDP bad ha kawei ka sngi ka UDP kan sa wan ha ka bor naka bynta ka ioh iaka jingkylla hapoh ka thain Jaintia Hills bad ha ka jylla baroh kawei” ula ong.
U bah Kyrmen ula shaniah ba ka sorkar kan lah ban wanrah ka jingkylla bad ka jingmyntoi na ka bynta u paidbah ka Meghalaya.
“Haba iadei bad ka VPP, ka don iala ka jong ka nongrim kata ban shakri ia u paidbah bad ka UDP ruh ka don ka juh ka thong hynrei ka shong pat ha u paidbah, iano un jied, iaka VPP ne ka UDP ne ia kiwei pat ki party” ula ong.
