Shillong, Rymphang 17 : U Lamphang ka Iingdorbar Thaw Ain Thomas A Sangma ha ka sngi Ba-ar, ula rai ban nym shah ban iatai ia ka jingjia bthei par dewiong ha Mynsngat-Thangsko, da kaba pynpaw ba kane ka rai jong u ka dei kaba khatduh bad kaba long kat kum ka rule.
“La pyntip sha nga ba kane ka kam ka long sub judice bad ka dang don ha ka jingbishar ka Iingkashari bad kumta, nga la shim ia ka rai kat kum ka Rule 57, sub-clause 6. Nga iengskhem ha kane ka rai bad ka rai u Lamphang ka dei kaba khatduh” ong u Thomas haba bynrap ba u Myntri Rangbah ka Jylla ula dep ban ai ia ka suo-motu statement halor kane ka jingjia.
Haba kdew ia ka rule, u MLA ka VPP na Nongkrem ula iasait ba ka ktien ‘sub judice’ la ju pyndonkam beit da ka liang synshar ban kiar ia ka jingiatai.
“Kum ka Iingdorbar, ngi don ia ka hok ban iatai ia ki kam ba sngewkhia. Wat ki Iingkashari dalade ki la pynksan ba ym don jingteh ia ki jingiatai jong ki Iingdorbar Thaw Ain ( tang namar ba ka kam ka dang don ha ka jingbishar jong ki)” ula ong.
Ula kyntu ba dei ban shah ia ki dkhot ka Iing ba kin iakren halor ka jingjia bthei ka par dewiong ha Mynsngat-Thangsko.
“Ki paidbah ka Jylla ki kwah ban tip kaei ka daw kaba lam sha kane ka jingjia ba sngewsih bad ki kam ba iadei bad ka jingtih dewiong beain ha ka Jylla” ula ong.
U Nongialam ka Liang Pyrshah Mukul Sangma ula kyrshan ia kane ka jingdawa.
Ula ong ba ka Sorkar kala dei ban kyrpad ia ka Iingkashari ba kan shim bishar kyrpang ia kane ka jingjia, ym ban klob lang bad kiwei ki PIL.
Hynrei u Lamphang, ula kyntait ban khyllie biang ia kane ka mat bad ong “Ngin ym iakren shuh ia ka, namar nga la dep ban shim rai” haba pynkut syndon ia kane ka jingiakren.
