Shillong, Risaw 07 : Ka Meghalaya Pradesh Congress Committee (MPCC) hynne ka sngi thohdieng, kala pyntip ba ki san ngut ki MLA ba shah sospon kim shym la pyni dak satia ba ki kwah ban wan phai biang sha ka Party.
Ia kane la pyntip da u Working President ka Congress Bah Pynshngainlang N Syiem uba la ong “Ha kajuh ka por, ka Congress ruh kam shym la pyni dak ba kan dang pdiang biang ia kine ki MLA”
U Bah PN Syiem ula pynpaw ia kane haba kylli ki lad pathai khubor ia kaei kaban jia ia ki san ngut ki MLA ba shah sospon shuwa ba ka Jylla kan leit sha ka elekshon MLA 2023.
“Namar ka elekshon kala nang jan, ngi kwah ban pynthikna ba ngi don ha ka lynti kaba dei na ka bynta u snem 2023. Namar kata, ngim don por ban peit sha ki (MLA ba shah sospon). Ka kam ia mynta hi ka long ba ngi dei ban pynkhreh janai ialade ban pynthikna ba ki kyrtong kin don hapdeng ka jingiakhun” ula ong.
Haba kylli la kine ki MLA kin shah kynjat noh na ka party, une u Working President ula ong ba ka jingbeh seng ia kine ki MLA kam hap satia hapoh ka jingkhmih jongka MPCC. “Ka shong ha ka jingpyrkhat,ka jingsngew bad ka rai jong ka All India Congress Committee (AICC) bad ngi ieh beit ha ka jingstad jong ka AICC” ula bynrap.
Kine ki san ngut ki MLA ba shah sospon ki kynthup ia I Kong Ampareen Lyngdoh (East Shillong), Mayralborn Syiem (Nongpoh), PT Sawkmie (Mawlai), Mohendro Rapsang (West Shillong) bad Kimfa S Marbaniang (Rambrai-Jyrngam).
Kine ki MLA kila shah sospon ha ka 27 tarik u Iaiong hadien ba kila rai ban leit kyrshan ia ka Sorkar MDA ba kyrshan da ka BJP.
