Kohima, Nailur 26 :Ka sorkar Nagaland kala pulom na ka bynta ban phah ia ka syrnot pyntreikam (utilisation certificates- UCs) na ka bynta ki 251 tylli ki projek kiba kot sha ka T. 609.07 klur.Ia kane ka pynpaw lyngba ka kaiphot jong ka comptroller and auditor general (CAG).
Ka CAG kala ong ba ka sorkar Nagaland kala pulom ban phah ia ka UCs halor ki projek kiba ka pyntreikam na ka bynta kine ki 10 tylli ki snem jong ka mangtyngka.
Kat haduh u bnai Lber 2021, kila don 173 tylli UCs kiba iadei bad ka jingpyntreikam ia ki projek kiba la kot sha ka T. 396.47 klur ia kiba la dei ban phah naduh ka snem 2011-12 haduh ka snem 2019-20, Katba u snem 2020-21 u dei uba la pynsahkut bun tam, kata haduh 78 tylli ki UCs na ka bynta ki projek kiba la kot sha ka R. 212.60 klur, pynpaw ka CAG.
Ka CAG kala ong ruh ba ka jingbym phah ia ki utilisation certificates ka buh ha ka jingma halor ka jinglah ban pyndonkam bakla ia ka pisa.
Ka jingbym phah ia ki UCs da ka sorkar Nagaland ka lah ruh ban pynlong ia kane ka jylla ba kan duh noh ia ki jingiarap pisa lyngba ka sorkar pdeng.
Ki tnat treikam ba kongsan ki bym shym la lah ban pynbiang bad phah ia kine ki UCs ki kynthup ia ka tnat Rural Development, kata da T.184.35 klur, ka tnat Planning bad Coordination T.166.54 Klur bad ka tnat Education T. 73.65 klur.
