Tripura, Jylliew 29: U Myntri Rangbah (CM) barim ka Tripura u Manik Saha um shym la ioh lad satia ban shim smai kum u dkhot jong ka Tripura Legislative assembly watla u la shah jied don burom namar ka jingbym pat ieh ia ka kam MP ka Rajya Sabha.
U Saha u ba bat ruh ia ka kam kum u dkhot ba tang marwei ka Rajya Sabha na ka jylla u la hap ban iehnoh na kane ka kam na ka bynta ban shah pyntian smai, ong u Lamphang ka Tripura Legislative Assembly u Ratan Chakraborty hadien ka jingpyntian smai ia ki laingut ki dkhot (MLA) bathymmai ki ba dang shu jop shen hadien ka ilekshon shiteng samoi.
U MLA ka Congress u Sudip Roy Barman lem ba ki arngut ki MLA ka BJP, ka Swapna Paul Das bad ka Malina Debnath ki la shah pyntian smai ha kane ka sngi ba Ar ba la lah lyngba ka jingialang ka ba rit hapoh assembly ka jylla.
U Chakraborty u la ong, hadien ba u la shah jied kum u MLA, u CM u don por 14 sngi ban pyndep ia ka jingshim smai. Namar ba u bat ruh ia ka kam kum u dkhot ka upper house jong ka ri, kumta ruh u la hap ban pyllait noh ia kawei na ki. “Ngi dang iai ap ia ka jingshim rai ka jong u,” ong u Chakraborty.
Kumba ka paw hi, u Dr. Saha un iehnoh ia ka kam kum u dkhot ka Rajya Sabha hapoh kine ki khyndiat sngi ki ban wan.
Katkum ki kyndon un hap ruh ban pyndep ia kane ka jingiehnoh kam da ka ba leit mih hi da ka met. Ki tyllong khubor ki iathuh ba ia ka jingialang pyntian smai yn pynlong ha kane ka taiew ka ban wan.
Ha kawei pat ka bynta, ki nongmihkhmat ka CPI (M) ki la kyntait ban iashim bynta ha ka jingialang pyntian smai da ka ba kynnoh ia ka sorkar synshar BJP halor ka jingleh kam thok na ka bynta ban ioh ia ka jingjop ha kane ka ilekshon ka ba dang shu dep shen.
Na ka liang u Secretary ka CPIM ka jylla u Jitendra Chowdhury u la ong ba ka BJP ka la pyndonkam lut ia ki kam buittuh ban ioh ia ka jingjop ha kane ka ilekshon, bad dei na kane ka daw ba ki nongmihkhmat ka Left ki la pynlong da ka jingiakhih da ka ba kyntait ban leit iashim bynta ha katei ka jingialang pyntian smai.
Ha Guwahati ruh ki party liang pyrshah ba la lamkhmat da ka Congress ki la pynlong ka jingiakhih pyrshah ia ka sorkar ba la lamkhmat da ka BJP ha ka ba ki la dawa ban pynher krad ia baroh ki MLA ka Maharashtra ki ba don mynta ha ka nongbah Guwahati bad dawa ruh ba ka sorkar ka dei ban pynleit jingmut ha ka ba iadei bad ki kam aijingrap sha ki lanot shlei um.
