Shillong, Iaiong 2 : Ki Tnad treikam bapher bapher ka Sorkar Jylla ki khlem lah ban aiti haduh 307 tylli ki Utilization Certificate (UC) sha ka Sorkar Pdeng ha u snem bala lah kaba kot haduh T. 2373.51 klur tyngka bad ka Tnad kaba bun eh ba khlem ai UC ka dei ka Community & Rural Development kaba long haduh 47.92%.
“..haba kut jong u Lber 2022, haduh 307 tylli ki UC ba kot T. 2373.51 klur ki dang sahkut ha ki kot ki sla jong ka Principal Accountant General (A&E) Meghalaya” ong ka kaiphod State Finance Audit jong ka Comptroller and Auditor General ka India haba kut jong ka 31 tarik Lber, 2022.
Ki Tnad kiba khlem lah aiti bun eh ki UC bad ka percentage na ka pisa ba dang sah hapoh ka Grant-in-Aid ka dei ka Community & Rura Development kaba kot T. 1137.40 klur (47.92%), Planning department-T. 457.58 crore (19.28%), Health and Family Welfare department T. 272.22 crore (11.47%), Social Welfare department T.198.99 crore (8.38%), Education and Human Resource Development T.171.78 crore (7.24%) bad ka Border Areas Development department T.37.36 crore (1.57%).
Ki Tnad kiba ioh ia ka Grant-in-Aid na ka Sorkar ki donkam ban aiti ia ki Utilization Certificate (UC) sha ka Principal Accountant General (A&E) bala soi da ki bor ba dei sam hadien ka jingpynthikna bha.
Ka jingpyndonkam ia ka Grants-in-Aid kumba la thmu, lah ban pynshisha tang hadien ka jingiohpdiang ia ki UC, kaba lah ban pynthikna ba kam don satia ka jingpyndonkam ia ka pisa sha kiwei pat ki kam.
Namar ka jingbym ioh pdiang ia ki UC, ka jingpynlut bala pyni ha ki account yn ym lah satia ban khein kum kaba khatduh lane lah ban pynthikna ba ia kane ka pisa la pyndonkam kat kum ka kam kaba thmu.
Ka jingbym aiti ia ki UC ka mut ruh ba ki borkhmih ki khlem batai ba kumno kila pynlut ia ka pisa ha kine ki snem. Kam don satia ka jingpynthikna ba ka jingai ia kane ka pisa kat kum ka kam ba thmu, ka dei kaba seisoh.
Ka kaiphod ka ong ba namar ka jingbym don ki UC, ym lah satia ban pynshsiah la ki nongioh ia ka pisa kila pyndonkam ne em ia ka pisa na ka bynta ki kam bala ai ia kane ka pisa.
Ka ong ruh ba da ka jingbym don ki UC, ka long kaba eh ban ioh jingkhein ia ka jingpyntreikam ia ki skhim bala mang na kane ka pisa.
Ka kaiphod ka ong ruh ba ka jingsahteng bun eh ban aiti ia ka UC ka dei kaba buh ha ka jingartatien ioh don ka kam thok bad jingbamklop ia ka pisa.
Ka ong ba ka long kaba donkam ia ka Sorkar Jylla ban peitthuh bha ia kane ka bynta bad kam dei tang ban tynrong ia ka jingkitkhlieh ha ki briew kiba dei ban aiti ia ki UC ha ka pork aba dei sah ka Tnad Finance bad ruh sha ka PAG (A&E) hynrei ban shong bishar ruh ia ka rukom pyllait ia ka song pisa ban dang wan sha ki Tnad kibym lah ai UC.
