Shillong, K’lyngkot 07 : Palat 26 ngut ki MDC la kynnoh ba ki khlem lah ban aiti ia ka jingtip halor ka jingpyntreikam ia ka Council Scheme on Special Town and Rural Welfare Programme.
Ia katei la lap da ka Comptroller and Auditor General of India (CAG) ha ka kaiphod jong u snem ba kut ha ka 31 tarik u Lber, 2019.
Ka Khasi Hills Autonomous District Council (KHADC) kala pyntreikam ia ka Council Scheme on Special Town and Rural Welfare Programme da ka jingthmu ban pynbiang ia ki jingiarap ia ki longiing kiba duk kiba mad ia ki jingeh bad jingshitom, khnang ba yn ailad ba kin lah ban iakhun ia ka jingeh bad ha kajuh ka por ban pynshlur ia ki ban shim ia ki lad ban ieng hala ki jong ki kjat.
Ki kyndon jong ka scheme kila kdew ba ia ka scheme dei ban pyntreikam da ki MDC bad ia ka pisa dei ban pyllait beit sha ki MDC bad kadei ka jingkitkhlieh jong ki MDC ban pynthikna ba ia katei ka bhah tyngka yn pyndonkam ha ka lynti kaba dei bad kaba khuid ba suba bad kan dei ruh ka kamram jongki MDC ban aiti ia ka Utilisation Certificate (UC) hapoh 6 bnai na ka tarik ba la pyllait ia ka pisa ryngkat bad ka jingkyrshan jong ki kot ki sla.
Ha u snem 2018-19, ka KHADC lyngba ka jingmynjur jongka Executive Committee, ka la bhah ia ka song pisa ba T.182.00 lak (T. 24.00 lak ha ka 12 tarik u Iaiong 2018 bad T.158.00 lak ha ka 15 taruk u Kyllalyngkot 2019) kum ka Grand-in-aid lyngba ka Special Town and Rural Welfare Programme sha ki MDC kaba long T. 4 lak ia ki 7 ngut ki MDC, T.6 lak sha ki 7 ngut ki MDC bad T. 8 lak sha ki 14 ngut ki MDC bad ka jingbthah ka long ba ki dei ban aiti ia ki UC hapoh 6 bnai naduh ka sngi bala pyllait ia ka pisa.
Ha ka jingkhmih bniah, la shem ba u Secretary ka Executive Committee, KHADC ula siew T.182 lak (T.24 lak ha ka 13 tarik u Iaiong 2018 bad T.158 lak ha ka 21 tarik u Kyllalyngkot 2019) kum ka Grant hapoh jong katei ka programme.
“Halor katei ka grant, tang 2 ngut ki MDC kila aiti ia ki kot ki sla bad ki UC kaba T.14 lak (T.8 lak kaba la ai da MDC sha ka SHG ki kynthei da kaba ai ia ki tiar ki tar kum ki tiar iing, tarpaulin bad kiwei kiwei bad T.6 lak la siew da u MDC sha ki 128 ngut ki riewshimet kaba long naduh T. 1000 haduh T.33000 ban maramot ia ki iing ban thied ia ki tin sopiing, ban thied kot skul, PA system, ki dawai dashin, ki tiar ialehkai, ki uniphom skul, ki shuki plastik bad kiwei kiwei” la ong ka CAG.
“Nalor kane ym shym la don ki rekod ba ki 26 ngut kiwei pat ki MDC ba kin aiti ia ki jingtip jong ki longiing baduk, SHG, ki sengbhalang bad ki riewshimet kiban kyntiew ia ki paidbah ha nongkyndong, ban ai jinghikai ban ieng hala ki jong ki kjat, ban pynkupbor ia ki kynthei, ban pynkup bor ia ki briew kiba don jingduna ha ka dkhot met ia kaba la ai iaka grant da ki MDC,” kala ong bad ka pyntip shuh shuh ba “Ki UC ryngkat bad ki kot ki sla kiban kyrshan ym shym la lap ban aiti. Kumta na ka jingbym don ia ki kot ki sla ban pynshisha ia ka jingpyndonkam ia ka T. 168 lak na ka pisa jongka Council ym shim la lah ban pynthikna da ka Audit.”
Haba pdiang ia ka jinglap jong ka Audit, u Secretary jongka Executive Committee, KHADC kala pynpaw ha u Nailar 2022 ba watla la phah ia bun tylli ki jingpynkynmaw, ki MDC kila pulom ha kaban aiti ia ki Utilisation Certificate kiba kongsan.
Ka CAG kala bthah ba ka Council kadei ban buh bha ianki kot ki sla kiban kyrshan iaka jingpynthikna ia ka jingpyntreikam ia ka pisa jongka prokram na ka bynta ki kam kiba dei bad ka bynrap ba ka Council ka lah ban thaw ia ki kyndon ai ban tehlakam ia ka jingpyndonkam iaka Discretionary Grants kaba la aiti sha ki MDC na ka bynta ki kam na ka bynta ka bha ka miat bad ban don ia ka jingbuh ia ka jingkhein jingdiah kaba biang.
