Shillong, Iaiong 19: U Symbud Myntri Rangbah ka jylla u Bah Sniawbhalang Dhar ula ong, ba ka sorkar jylla haduh mynta kam pat shym la ioh pdiang ia ka jubab na ka Harijan Panchayat Committee (HPC) watla ka jingai por ka sorkar jylla kala kut noh haka 10 tarik mynta u bnai ban jubab halor ka blue print.
“Haduh mynta ngim pat ioh ia kano kano ka jubab bad ha kine ki sngi ban wan ngin sa shong jingialang noh hadien ba u Symbud Myntri Rangbah ka jylla Bah Prestone Tynsong ula wanphai sha ka jylla bad la khmih lynti ba ha ka taiew ban wan ka sorkar kan lum noh ia ka jingialang” ong u Bah Sniawbhalang Dhar uba long ruh u Myntri Kam Pynroi Sor.
Haba kylli na kaei ka daw ba ka HPC kam shym la ai iaka jubab haba ka sorkar kala ai por haduh ka 10 tarik u Iaiong, u Bah Sniawbhalang ula ong, ba ia ka daw dei ban kylli naka HPC balei ba kam jubab bad kadei ka kamram ka jongki ban ai iaka jubab.
“Lada kim phah ia ka jubab, ka sorkar kan sa shong iaka jingialang ban iakren halor kane ka bynta bad ngi don hangne ban shim ia ka rai na ka bynta ka jongki” ong u Myntri Sorkar.
Ula ong ka sorkar kala pyrshang ban pynbeit kloi noh ia kane ka mat khamtam haba ka iingkashari ruh kala bthah ba dei ban pynbeit noh mardor ia kane ka kam.
