Shillong, Jylliew 27: U President ka NPP-Meghalaya bad MP ka Rajya Sabha Dr WR Kharlukhi ula pynpaw ba ka NPP kam don jingartatien satia ban iatreilang biang bad ki paralok kiba don mynta ha ka Sorkar Meghalaya Democratic Alliance (MDA) lada ka shah jied ban shimti biang ia ka bor synshar.
“Ka NPP kam don jingartatien ban iatreilang biang bad ki paralok lada ka MDA ka shah jied biang sha ka bor” ong u Dr Kharlukhi haba pynpaw ba ka NPP ka sngewtynnad ia baroh ki paralok kiba don ha ka MDA.
U Dr Kharlukhi ula ong “Ngi la iatreilang la jan kot 5 snem mynta, ngi sngewtynnad ban iatreilang bad ki bad ngi kyrmen ba ki ruh ki sngewtynnad ia ngi”.
Haba kylli, u Dr Kharlukhi ula niew ia ka jingiaid ialap pyrshah sorkar jong ka BJP ba ka dei tang ka buit politics.
“Kane kam don eiei hynrei tang ka buit politics” ula ong haba bynrap “Na ka jingiohi jong nga, ka long kaba sngew tynnad ban iabam lang na kajuh ka pliang bad ki paralok bad ha kajuh ka por ka long kaba sngewtynnad ban iathuh ba ki paralok jong phi ki ai ia ka bam ba long bih”.
U Dr Kharlukhi ula ong ba ym dei tang ka BJP hynrei baroh ki seng sain pyrthei ki angnud eh ba ka party jong ki kan ioh thaw ia ka Sorkar ha Jylla.
“Wat ka AITC, Congress, UDP bad kiwei kiwei ki kwah ia kane bad mano u bym kwah ban iohi iala ka jong ka party ba kan thaw sorkar ha Jylla” ula ong.
Halor ka jingpynkhreh jong ka NPP ia ka elekshon MLA 2023, u Dr Kharlukhi ula ong “Ngi la pynkhreh ialade bad ngi la pyrshang kat kaba lah ban iohi ba ngin ioh ia ka jingjop ha ka elekshon ban wan”.
U ong ba ka party kan sa iathuh ia u paidbah ia kaei kaba kala leh la ka dei ka kam pynroi ne ki kam kiba la leh kat kum ka jingdawa jong u paid nongshongshnong ka Jylla.
Kat kum ka jingong jong u, ka NPP kan sa khot thep kyrteng shen ia ki kyrtong ba kwah iakhun ia ka elekshon 2023 bad kan sa pynbna ruh ia ka thup kyrteng.
Une u Nongialam ka NPP ha Jylla ula pyntip ba ki don ruh katto katne ngut na ki MLA ba mynta kiba la pynpaw ia ka jingkwah ban wan pyniasoh noh sha ka NPP hashuwa jong ka elekshon. “Lehse ka lah ban kot 10 lane 15 ngut, ngin sa iapeit” ula ong.
La ka AITC kan dei ka jingma ia ka NPP, u Dr Kharlukhi ula ong “Ngim pat mad ia ka AITC. Namar kata, tang hadien ba ngi la mad ngin sa tip la ka dei ka jingma ne em” bad bynrap “Lada kam long shispah na ka shispah hynrei kin don 55-56 ki Constituency kiba ka NPP kan iakhun pyrshah iaka AITC, pyrshah ia ka Congress bad ruh pyrshah ia ka UDP bad ka HSPDP”.
