Shillong, Lber 01: Ha kawei ka jingjia aksiden, uwei u nongniah trok ula khlad ha shen, haba ka trok kaba ula niah kala leit tynrah ia kawei pat ka trok ha Mawdiangum haka surokbah National Highway-6, kaba la jia dang step ha ka sngi Thohdieng.
Une u nongniah uba la khlad noh, ula niah ia ka trok kaba don ia u nombar AS-01-RC-1762 hynrei namar ka jingpynher sted ym shim la lah shuh ban tehlakam bad ula leit tynrah ia kawei pat ka trok kaba don ia u nombar ML-11-A-1440.
Katkum ki khubor kiba la iohlum, la iathuh ba u nongniah jong ka trok na Assam ula sahkut hapoh jong katei ka trok bad la sei ia u da kiwei pat ki nongniah bad ki pulit.
Kala shim por haduh shiteng kynta ban sei ia une u nongniah uba la sahkut napoh jong katei ka trok bad hadien kane la pynkit noh ia u mardor sha Nongpoh Civil Hospital hynrei ynda la poi ha hospital kila pynbna ba ula dep ban khlad lypa.
Ki bor pyniaid jong ka hospital ki dang buh ia kane ka met naka bynta ban pyndep ia ki kam kiba iadei bad ka lynti jong ka aiñ.
