Nongpoh, Iaiong 11: Ha kawei ka jingjia kaba sngewsih, u wei u heprit ba dang 15 snem ka kyrta u la khlad noh hashen bad katto katne ngut na ki bahaiing ki la mynsaw hadien ba u wei u diengbah u ba don hadien ka iing sah ka jong ki u la khyllem kynsan bad ban ia ka iing.
Kane kala jia ha ka por 2 shiteng nohphai sngi jong ka 10 Iaiong 2023 ha kaba por ba u ne u khynnah u dang pule kot hapoh katei ka iing bad ki bahaiing hasem ki dang shongkai ha phyllaw iing.
Katkum ka khubor ba la iohlum, la ioh jingtip ba kane ka jingjia ka la jia ha ka por ka bym poi pyrkhat ha kaba u wei u diengbah u ba don marsyndah bad ka iing jong ki, u la khyllem bad u ne u heprit ba la khlad noh u dei ruh u khynnah pule jong ka skul St Frances D Assisi School ha ka ka shnong Umling.
Na ka liang ki bahaiing lem bad ki bor pyniaid Shnong ka Umling, ki la pynkit noh ia ka met jong u ne u heprit ha ryngkat ki bahaiing sha Civil Hospital Nongpoh na ka bynta ki jingsumar bad ruh ban pyndep ia ka post mortem bad hadien la aiti noh ban pyndep ia ka jinglehniam bad ruh ban pynkit ia ka met jong u tei u heprit sha ka shnong kaba u shong u sah ha ka jylla Assam.
