Shillong, Lber 18 : Sa uwei u Khynnah skul na Meghalaya ula iap hadien ka jingshitom jur na ka jingngat bih ha ka jingbam, kaba jia ha kawei ka hostel ba pyniaid be-ain da kawei ka skul shimet ha Malavalli, Karnataka.
Une u khynnah skul ba dang shu khlad u dei ba na ka thain Nongstoin bad la tip kyrteng ia u da u Namebantei Marwein ba 12 snem, ba dang pule klas VII,uba dei na ka shnong Sohparu, kaba jngai tang katno katne kilometer na Nongstoin.
Hynrei u Myntri Rangbah ka Jylla Conrad K Sangma ula pynthikna ia kane ka khubor ba sngewsih hynne ka sngi Ba-ar lyngba ka jingthoh ha X ba ong “Pangnud ban tipi aka jingkhlad sa uwei u Heprit na Meghalaya ha Karnataka. Nga phah ia ka jingsngewlem sha ki bahaiing hasem”.
Kane ka jingjia kaba la jia ha ka hostel jong ka skul Gokul Educational Institution Residential School kaba don ha ka shnong T, Kagepura, Mandya District, Karnataka, kala shim ia ka jingim ki arngut ki heprit na Meghalaya. U heprit ba khlad nyngkong u dei u heprit Khrehlang Khongtani , ba pule klas VI, uba la khlad ha ka sngi U Blei.
Haduh 23 ngut ki khynnah skul na Meghalaya kila sah ha kane ka hostel kaba la aibam da ki jingbam ba sah bad kiba tam na ka jinglehniam Holi na ki jaka ba marjan. Hadien kane ka jingjia, ia ki khynnah skul baroh kiba shitom, la pynkit noh sha hospital da ki bor pyniaid District.
Ka Sorkar Jylla kala pynbna ia ka song jingiarap ba T. 3 lak sha ki bahaiing jong kine ki khynnah ba iap bad kular ruh ban pynlut pynsep ia ka jingsumar ia kiba dang don hapdeng ka jingshitom.
Halor kane ka jingjia, ka Sorkar Meghalaya ha ka sngi Nyngkong, kala phah ia u Deputy Inspector of School Bah P Sun bad u Sub Divisional School Education Officer Bah R Kharsyntiew na ka District MIS, PM-POSHAN, ba kin leit sha Karnataka.
Kine ki Ophisar kin iatreilang bad ki bor pyniaid district bad ban ai jingiarap ia ki kmie kpa jong ki khynnah kiba iohpang na Meghalaya.
Ka Sorkar Jylla kala peit pyrman bha ia ka jinglong jingman bad ka dang iabuddien beit bad ki bor Sorkar ka Karnataka ban pynthikna ia ka jingsumar ba paka ia kiba dang don hapdeng ka jingsumar.
Ka Sorkar kala phah sa ia u Commissioner & Secretary (Home) Bah Cyril Diengdoh sha Karnataka bad da ka jingiasyn u DC Mandya, kila leit jngoh ia ki khynnah ba don ha hospital ban peit ia ka jinglong ka koit ka khiah jong ki bad ban peit ruh ia ki jingiarap kaba kine ki khynnah ki donkam.
