Shillong, Iaiong 21 : U Pope Francis ula khlad noh hapoh 24 kynta ba u mih paidbah khatduh ha ka jingrakhe ia ka Paskha Bakhuid ha St Peter’s Square hapoh Vatican.
Ula ai khublei ia ki paidbah na ka shuki shaka, ryngkat ka kaweh kti bad ong “Para shynrang bad kynthei, Paskha bakmen ia baroh”. U nongialap ula pule ia ka khubor Paskha bad ka jingkyrkhu katba u dang sah bad peit ia ki paidbah.
Hadien ka jingkyrkhu, ia u Pope la ialam pyniaid sha ka Square ha kaba bun ki riewngeit kila wan ialam ia ki Khunlung sha u ba un ai ka jingkyrkhu.
U Pope Francis ula pyrkhat lypa ia ka jingleit ontep kabym bun ki jngit ki jnat, kaba pynkut ia ka jingpynkhreh ba ju leh baroh shikatta haba leit ontep ia ki Pope. Ia ki Pope kiba rim la ju tep ha ki lai tylli ki synduk (cypress, lead bad Oak) hynrei u Pope Francis ula jied ia ka synduk dieng bad u zinc.
Ula pynkut ruh ia ka dustur ban buh ia ka metiap u Pope ha ka rynsan (platform ba ju khot ka Catafalque) ban ioh peit ki riew paidbah. Ha ka jaka kane, ki nongleit sngewlem kin pyndon burom khatduh ia u ha ka synduk kaba plie khlem ka jingtap.
U Pope Francis un dei u Pope ba nyngkong ha palat 100 snem ban leit tep shabar ka Vatican bad yntep ia u ha Basilica jong ka St Mary Major ha Rome.
U Pope Francis ula thaw histori kum u Pope ba nyngkong na America bad ka thain Shathie bad u Pope u bym dei u nong Europe la palat ia ka 1200 snem.
U dei ruh u Juseuit ba nyngkong ban long u Pope bad bteng ban wanrah ia ki jingkylla haba ioh ruh ia ka jingburom jong baroh ki riewngeit.
U Pope Francis ula shah jied ha u 2013 kum u Cardinal Jorge Bergoglio ka Argentina. Shuwa ia u, u Pope Benedict XVI, ula hiar shuki ha u 2013-u Pope ba nyngkong ban shongthait da ka mon sngewbha ha kine ki 600 snem bala leit.
