Shillong, Rymphang 20 : U Myntri kam Pohiing barim Bah HDR Lyngdoh uba dei ruh u kyrtong ka UDP na Sohiong Constituency, ula khlad noh hynne ka janmiet ha Bethany Hospital.
U Bah HDR Lyngdoh ula kem pang kynsan kynsan hynne ka janmiet hadien ka jingleit iashimbynta ha ka rynsan ialap elekshon ha Mawmaram.
Kat kum ka khubor la iathuh ba une u Rangbah ula khlad noh ha ka por 4 baje janmiet bad la suba jur ba ka jingiap ka lah ban dei na ka jingpang kyndeh mynsiem.
U Bah HDR Lyngdoh ula jop nyngkong eh ia ka elekshon MLA ha u snem 1988 na ka seng Hill State People’s Democratic Party (HSPDP) bad ula shah rem noh ha u snem 1998 ha u Bah RA Lyngdoh jong ka United Democratic Party (UDP).
Hynrei ha u snem 1999, ula shah jied kum u MDC ka Sohiong-Nongspung constituency n aka Indian National Congress (INC) bad ula wan phai biang kum u MLA ha ka elekshon MLA 2003 tad haduh u snem 2018.
U bah HDR Lyngdoh u dei uwei na ki 6 ngut ki kyrtong kiba la mih ban aireng ha kane ka elekshon MLA kum u kyrtong ka United Democratic Party (UDP) ka ban long ha ka 27 tarik Rymphang, ban wanphai biang kum u Nongmihkhmat.
U Bah HDR Lyngdoh ula shah pynrem kum u kyrtong ka Congress ha ka elekshon MLA 2018 ha u Bah Samlin Malngiang na ka HSPDP.
