Itanagar, Naiwieng 04: U MLA ba mynta ka Bharatiya Janata Party (BJP) napoh Arunachal Pradesh u Jambey Tashi ula khlad noh hapoh ka hospital ha Guwahati ha ka sngi Balang ba la lah hadien ka jingshitom kaba la bat kham slem, ong u dkhot jong ka longiing.
U Tashi 48 snem rta ula long MLA laisien kynthih napoh Lumla seat, bad u dei u dkhot jong ka National Minority Morcha jong ka BJP.
Haba pynpaw ka jingsngewlem halor kane ka jingkhlad noh jong u para arkmie jong u, na ka liang u Myntri Rangbah (CM) ka jylla u Pema Khandu ula pynpaw lyngba ka Twitter da kaba ong; “Ka jingkhlad noh u para jong Nga u Jambey Tashi, u MLA ka Lumla Assembly Constituency ka long ka jingduh kaba khraw na ka bynta jong Nga shimet, bad Nga sngewsih jur halor kane ka jingjia ba sngewsih.Nga ia don ryngkat lang bad ka iing ka sem ha ki jingduwai na ka bynta ka myndiem bala leit jong u.”
U Tashin ula iehnoh shadien iala ka kurim ka Tsering Lhamu, laingut ki khun kynthei bad uwei u khun shynrang.
U Tashin ula shah jied khlem da don kino kino ki nongia aireng pyrshah na Lumla Assembly constituency kaba ha Tawang district, kata na ka tiket ka seng Congress ha u snem 2009. Ula shah jied biang ha u snem 2014.Ula jop ha ka ilekshon ka jylla ha u 2019 na ka tiket ka BJP.
Ia ka metiap jong u la pynkit noh da ka liengsuin helicopter na Guwahati sha Lumla.
Kum u nongialehkai badminton ba tbit bad kum u nongialam uba ju shang kylleng, la tip bha ia u Tashin kum u briew uba trei na ka bynta ka bha ka miat jong ki riew madan bad uba ialeh ban pynneh pynsah ia ki riti dustur.Hadien ba ula pyndep ia ka skul na Tawang Government Higher Secondary School ha u snem 1993, u Tashi ula pyndep ia ka graduation na Zakir Hussain College ha New Delhi.
Kum u nongtrei kam bhalang ba pawkhmat, ula shah jied nyngkong eh kum u dkhot ka anchalik samity ha u snem 2001 ha kaba ula trei haduh u snem 2007, nalor kata ula bat ruh kum u president jong ka seng Yuva Arunachal naduh u snem 2001 haduh u 2005.
